今年有唔少台灣飲品過江龍，要突圍而出，呢間就靠佢地嘅彩色珍珠！品牌嚟自台南，主打台灣出產茶葉同台灣有機食用花，配以用唔同食材天然上色嘅手工珍珠。首間分店已經登陸尖沙咀海港城，望住海景飲天然茶飲特別爽！
 

十一茶屋首間海外分店位於尖沙咀LCX，唔少材料都係嚟自台灣，例如珍珠就沿用台南手工珍珠，唔同顏色嚟自唔同食材：蝶豆花嘅藍色、紅肉火龍果嘅紅色珍珠、抹茶嘅綠色、甘荀嘅橙色等。茶葉、食用花同蜂蜜亦從台灣運嚟香港。
 

玫瑰優格配彩色珍珠（$40）

繽紛特調系列即係冰沙，可以免費配一款手工珍珠。玫瑰優格係台灣熱賣口味之一，用有機食用玫瑰花瓣、玫瑰花茶、乳酪加冰打成。淡淡粉紅色加上花瓣碎同手工彩色珍珠，打卡一流！飲落味道以乳酪為主，帶甜甜地嘅玫瑰花香，相當討好。彩色珍珠嘅味道其實唔係好食得出有咩分別，口感軟Q加上細細粒幾好咬。
 

夏日聖誕配火龍果珍珠（$40）

白色嘅沙冰係用可爾必思（CALPIS）、鮮榨檸檬汁加冰打成，冰涼酸爽非常醒神！火龍果珍珠因為係用白玉珍珠浸鮮打紅肉火龍果汁去上色，所以擺耐咗嘅話果汁可能會滲出嚟，形成粉紅色漸層。每日都有唔同口味嘅手工珍珠，包括彩色、白玉、藍蝴蝶、火龍果、蜜桃抹茶同小薯圓。
 

小王子星球（$30）

呢度亦有花茶、花茶蜜同鮮奶歐蕾供應。尖沙咀店暫時最受歡迎嘅有呢款由個名到賣相都好夢幻嘅小王子星球，裡面係蝶豆花茶，加上金桔、檸檬同台灣蜂蜜。因為蝶豆花無乜味道，所以飲落以金桔同檸檬嘅酸味為主，加上清甜蜂蜜，係比較清新嘅一款。
 

 

奇幻漂流（$30）

薰衣草森林（$30）

新店仲有兩款香港限定花茶蜜！奇幻漂流係洋甘菊茶配薄荷同蜂蜜，凍飲更顯清涼口感，不過草本味道都幾濃下，未必個個都接受到。而薰衣草森林就係薰衣草加上蝶豆花形成夢幻紫色，加上檸檬同蜂蜜，兩杯都有非常亮眼嘅漸層效果，買完行去露台打卡就最啱啦。
 

十一茶屋
尖沙咀廣東道3-27號海港城海運大廈3樓LCX 20B號舖

文、相、片：Cathy