呢兩年多咗唔少越式Pho店開張，最近就有呢間過江龍。不過唔係嚟自越南，而係加拿大多倫多一間人氣餐廳，網上評語同評分都唔錯，甚至被評為小鎮最好嘅Pho！而銅鑼灣店亦提供各款越南河粉、小食同飲品，唔少材料都係由越南入口，落足心機。
Pho Metro有「Best Pho in Markham」之稱，由幾位由多倫多回流返港嘅店主引入。而銅鑼灣店亦係首間海外分店，八成餐牌同當地一樣，唔同嘅係加咗煎蝦餅、炸軟殼蟹等小食。從枱上放嘅是拉差醬或者都可以略知一二，因為喺越南湯河當中加是拉差醬係北美風格。
招牌越式湯河
特別牛肉湯河（$98）
先由香港人最熟悉嘅牛肉河開始介紹，湯底清澈而帶香草味，背後原因係用牛骨熬煮8-9個鐘，火候要控制得宜先做到香而不濁嘅效果。而嗰陣特別香味，其實就係八角同肉桂！而配料就包括嫩滑富牛肉香嘅美國生牛肉片、爽口唔油膩嘅腩片、彈牙嘅牛丸同爽脆嘅牛柏葉。
唔少北美同加拿大人就鍾意一邊食一邊加是拉差醬，而如果你想跟越南食法嘅話，可以咩都唔加先飲湯底原味。之後按自己口味加入餐廳提供嘅香料，呢度提供芽菜、九層塔同鵝芥，長條形嘅鵝芥係越南獨有嘅香草，香味類似芫荽，可以同九層塔撕開一齊放落碗粉度。之後再擠少少越南青檸汁，最後加指天椒粒或者魚露都可以，前者帶辣後者就增加鮮味。
特級蟹肉湯檬配軟殼蟹（$168）
叫得特級當然係有特別之處啦，呢款每日只限供應20碗！無他嘅，因為需要盅碎鮮蟹，再去殼只用蟹肉同蟹膏加埋蕃茄、洋蔥等材料去熬2-3個鐘。大廚話每三碗蟹肉湯檬就要用到一隻蟹，難怪碗粉一上枱就聞到相當鮮甜嘅蟹膏香。
唔單止湯底出色，用蟹肉、蟹膏加豬肉手工製作嘅丸子亦係啖啖肉香！豆卜亦吸滿湯汁鮮味，另上嘅軟殼蟹就炸到金黃酥脆，配埋越南檬粉係出色嘅。
越式香茅烤肉撈檬（豬扒）（$78）
都知道夏日炎炎大家未必想食熱辣辣嘅湯粉，呢度亦有撈檬同飯類提供。烤肉可以揀豬扒、牛扒或者雞扒，用香茅腌過後再放上扒爐明火烤熟，香味十足。
而檬粉配大量椰菜絲、青瓜絲、蘿蔔絲，再淋上調味魚露撈勻，微辣帶酸非常開胃。
更多【新店直擊】： |
特色小食+飲品
芒果米紙卷（4件）（$48）
越式米紙卷就食得多，比較少見加入芒果肉嘅版本。用越南米紙包住菜葉、米粉同芒果肉。最值得一讃嘅係米紙卷包得穩妥，半透明見到裡面嘅配料而拎上手唔會爛，食嘅時候亦無散開。食嘅時候可以點少少餐廳自己煮嘅花生海鮮醬，少少鹹味反而更突出到芒果嘅甜香。而菜葉同粉絲就增加口感層次，相當清新嘅一款前菜。
炸春卷（4件）（$38）
而炸春卷就係大家非常熟悉嘅小食，亦係餐廳自家手工包製，餡料有蝦肉、豬肉、芋頭同蘿蔔，將以上材料打碎包好再炸。芋頭肉加熱後變腍，口感層次同香味都更明顯。春卷皮薄、脆而唔油膩，夠哂香口。
牛油果沙冰（$35）
飲品方面就有椰子水、越式滴漏咖啡等等，沙冰就有芒果同牛油果選擇。略嫌牛油果香味唔夠濃郁，不過勝在甜味自然而且都打得OK幼滑嘅。
Pho Metro
銅鑼灣蘭芳道17號地舖
文、相：Cathy