肉食系朋友去日本一定要食牛肉丼,而家銅鑼灣都有得食喇!來自大阪嘅「肉工房千里屋」喺香港開設首間海外分店千里屋食堂,店舖創立於1991年,售賣和牛及供應牛丼為主,於日本有10幾間分店,並供貨俾超市,旗下亦有兩間燒肉店。於肉食祭更賣出超過一萬碗丼,相當人氣!


肉工房千里屋最引以為傲嘅係鹿兒島和牛,於自家農場經2年專人飼養,脂肪比例及肉質都經過嚴格控制。除咗西冷部位,更供應夏多布里昂(Chateaubriand)牛扒,位置近牛腰內肉,為最柔軟部位之一,每隻牛得2至3公斤,用鐵板燒至半熟狀態就最理想。

脂肪同肉層層相間,但食落唔會好肥,肉質細嫩,牛味啱啱好。想油花重啲,就可以揀西冷位。呢兩款得獎牛肉,可以揀鐵板牛扒定食,配味噌湯、白飯及漬物。亦可以揀高級丼,牛肉舖喺米飯上,淋上醬汁,更加惹味。

想經濟少少,可以食4吋高牛肉丼,有4款唔同款式,做法、醬汁都各有分別,用澳洲M10至M12級黑毛和牛及日本越光米製作。香港獨有火炙珠峰,用牛小排及牛腰肉兩個部位,鮮嫩牛腰肉放上面,牛味濃嘅牛小排就放下面,食得出唔同嘅口感同味道。

喜之愛·富士山雙重奏就係兩款唔同煮法嘅牛腰肉製成,上半部份係烤,肉較厚切;下部份就係薄切壽喜燒,配上香甜洋葱汁。嵐之戀·荒川就以60度低溫慢煮牛腰肉,而薰月·馥漫堂嘅牛肉經過醃製成半乾狀態,再低溫切成牛肉粒。牛肉帶微微香料味,配微甜醬油汁,食落冇咁膩。部份丼可以揀大盛及特盛,分別多1.5倍及2倍牛肉,啱晒牛魔王!



舖頭於2月2日正式開業,首月有優惠價,鹿兒島黑牛西冷高級丼更低至半價!想食就快快去試吓喇。
地址:銅鑼灣駱克道447-449號中威商業大廈地下2號舖
文、相、片:Perrins