又嚟到一年一度嘅母親節！為咗感謝媽媽多年來嘅辛勞，當然要買個靚靚蛋糕同媽媽慶祝盡顯孝心喇～唔知揀邊款好？開飯仔精選咗幾款高貴有特色又典雅嘅蛋糕畀大家，一定唔會令媽媽失望。

花漾母親節雪糕蛋糕 Häagen-Dazs

今年呢間雪糕專門店推出兩款母親節雪糕蛋糕～馨心相印啱晒鍾意高貴典雅嘅媽媽，外層呈紫色雲石鏡面，表面仲有兩朵粉紅色康乃馨點綴，而雪糕口味係士多啤梨。另一款花漾蜜語就由四個口味同顏色組成，每件蛋糕外層更鋪上花瓣，啱晒一家人分享。

BAILEYS Lava Cake BAILEYS x Cookie DPT

BAILEYS嘅甜品一向唔會令人失望，佢地襯住母親節同人氣曲奇餅店Cookie DPT合作，推出多款BAILEYS X Cookie DPT甜品。BAILEYS Lava Cake口感綿密滑順，切開後係滿滿BAILEYS流心，入口細滑，口感層次鮮明又豐富。建議配埋BAILEYS Original Irish Cream食，香濃酒香味可以中和蛋糕甜度。

玫瑰荔枝蛋捲 Kiyoka

由日籍甜品師松原明日香主理嘅日法甜品品牌，推出母親節限定蛋捲玫瑰荔枝捲！內餡加咗糖漬荔枝肉，蛋捲外層係玫瑰花味奶油，面層以可食用玫瑰花瓣、新鮮覆盤子、粉紅色朱古力片作裝飾，媽媽見到一定好sweet！

茉莉香梨慕絲蛋糕 龍島 

簡約優雅嘅蛋糕～底層係海綿蛋糕及焦糖朱古力脆脆，而上層係清新淡雅嘅茉莉花香慕絲同法國香梨果蓉，層層相間，口感豐富又充滿清新果香。面層舖上淡紫色雲石紋鏡面，再以羽毛狀嘅白朱古力裝飾，象徵母親展開溫暖嘅翅膀，好有意思。

Love you Mom 母親節蛋糕系列 聖安娜餅屋

呢間連鎖餅店推出「Love you Mom 」母親節蛋糕系列，一共五款。鍾意浮誇打卡嘅，一定要買高貴皇后，蛋糕以粉紅色為主調，而且更會附送一個皇冠，內餡為士多啤梨軟心餡配搭脆層及海綿蛋糕。另外仲有鮮果甜心圈、粉紅溫馨花語、牡丹花舞同瑰麗寶盒，一樣咁靚呀～

柚子抹茶海綿蛋糕+心形白桃玫瑰稀少糖蛋糕 agnès b. CAFÉ & FLEURISTE

兩款母親節限定蛋糕，造型都好靚呀～柚子抹茶海綿蛋糕配上玫瑰花造型，酸酸甜甜嘅柚子配上微微苦澀嘅抹茶，適合唔好甜嘅媽媽們。而心形白桃玫瑰稀少糖蛋糕，貼心地選用稀少糖製作，適合追求健康低卡生活嘅媽媽，同時又令媽媽甜入心扉。

限定純素蛋糕 Green Common

另外都有純素蛋糕選擇㗎～呢間素食餐廳同人氣甜品大師Holger Deh合作推出母親節限定純素蛋糕系列，包括獨家供應嘅紅莓慕絲蛋糕，微甜不膩。另有提供香草拿破崙、軟心朱古力榛子波及經典黑森林蛋糕，就算食素都有好多選擇！

文: Yanica