去開尖沙咀搵食嘅，一定會認同厚福街係「口福街」，由街頭行到街尾都有勁多間餐廳選擇，最新又有間意大利風格嘅小食店插旗。雖然話就話係街頭小食店，但除咗有炸物之外，連牛角包、意粉甚至鐵板小食都有，款式多樣。

小食店舖位細細，以外賣為主，附近返工嘅朋友買返office食都好方便。全部都係即叫即製，相當有心，不過就可能要有心理準備等耐少少。首先推介下牛角包，雖然係小店，但佢哋非常揼本，注重來貨，例如牛角包同法包都取貨自四、五星級酒店嘅供應商，再加入唔同餡料配搭，即叫即烘，酥脆又香軟。其中，煙三文魚蛋沙律牛角包，鹹香中帶清新嘅感覺。

即叫即炸嘅小食亦有多款選擇，最受歡迎又最抵食嘅，應該係即炸雞髀，大大隻，多多肉。每日都用新嘅滾油生炸，以160度高溫炸完一輪之後再轉以170度炸多陣，令到雞皮香脆而內裡肉汁依然鎖緊，咬落肉嫩多汁。雞髀有辣有唔辣，鍾意食辣嘅朋友仔可以請師傅幫忙，將香辣粉搽滿成隻雞髀呢，陣陣刺激感。

鐵板小食方面，則有鐵板蒜香雞翼尖、鐵板炒腸粉、鐵板蒜香雞軟骨等。

想飽肚少少嘅有意粉，特別要介紹下佢哋嘅卡邦尼慢煮溫泉蛋雞肉炒意粉，隻溫泉蛋特別用50分鐘去慢煮出嚟架，令到蛋汁較平時食開嘅更為漿口，更易黏住啲意粉，口感厚啲，同時亦能保留營養。而意粉嘅醬汁亦係師傅自家調製，淡淡奶油香，creamy得嚟唔會太膩。

Ricco
地址: 尖沙咀厚福街9A號地舖

文、相、片：Kar