話說迪士尼樂園第3間酒店將會喺嚟緊4月30號開幕喇，新酒店當然會有新餐廳。正所謂「去迪士尼做足準備」，開飯仔就率先去咗參觀同試食，仲做埋個報告畀你哋喇~

新酒店有3間餐廳，分別係以中菜為主嘅雲龍軒、國際美食嘅芊彩餐廳同埋主打輕食嘅星航圖咖啡廳，其中又以咖啡廳嘅米奇米妮造型甜品最為吸引。

雲龍軒

「龍」甜品拼盤

雲龍軒炒飯

呢間餐廳以中菜為主，無論係地道嘅農村風味、傳統粵菜定係其他中國省份嘅菜餚都可以一一試得到。餐廳以五行，即係金木水火土概念嘅烹調手法去處理菜式同埋做裝修設計，例如金就係炒菜、火係燒烤，而土就係用鍋蒸咁樣，大家都可以透過半開放式嘅廚房望到廚師整嘢食。早餐、同假日嘅午餐都係自助餐形式，晚餐就係單點，喺指定時間仲會有迪士尼朋友出嚟同大家見面say hello添。

芊彩餐廳

（左）伊甸園三文治、（右）泰式素麵

（左）泰式醃牛肉沙律、（右）帶子意大利燴飯

有中當然有西，芊菜餐廳就係以國際美食為主嘅，食物用上唔同國家嘅香料去製作，餐廳出面仲設有香草園，有迷迭香、薰衣草同檸檬草等成日用嘅食用香料睇。而用餐位置就可以選擇喺室內定室外，望住一片綠野園林咁食好西，應該幾relax時。

星航圖咖啡廳

相信呢間餐廳將會成為好多迪士尼粉絲嘅飛佛，因為佢哋嘅糕點同甜品都幾精緻，仲有啲係米奇米妮嘅造型嚟㗎，另外都有唔少輕食好似三文治咁！同埋嚟到呢度就唔好做低頭族喇，抬起頭望下啦，佢叫星航圖，天花板都係星河圖嘅設計嚟呀。

仲有，喺星航圖咖啡廳行過少少，就有間餅店，同樣都係可以見到師傅整餅㗎。側邊櫥窗仲有好多款靚靚造型蛋糕，如果有朋友或者小朋友生日，可以喺度考慮訂一個呀。

文：Kar
相：Calvin