情人節除咗食大餐，蛋糕都一樣唔少得。今年情人節唔同餅店推出嘅蛋糕賣相都好吸引，花呀心心呀粉紅呀呢啲女生最愛嘅元素都有，即刻睇下邊款最啱你同你BB啦！
水晶球玫瑰蛋糕 Twinkle Baker Décor
呢款紅莓玫瑰蛋糕有齊女仔鍾意嘅元素：玫瑰、水晶球同粉紫色，應該無乜女仔會抗拒到。裡面有紅莓牛油蛋糕、玫瑰吉士同紅桑子脆脆，而頂層嘅朱古力玫瑰花仲係人手製造，好有心思。如果怕太大個食唔晒嘅，都有細版選擇。好似呢款草莓慕絲蛋糕咁，面頭仲有馬卡龍同花花裝飾，一樣咁靚。
玫瑰歌劇院蛋糕 DALLOYAU
鍾意細細件蛋糕嘅仲有呢款選擇。玫瑰歌劇院蛋糕以浸泡咗玫瑰糖醬嘅法式杏仁海綿蛋糕、紅莓玫瑰奶油同70%黑朱古力醬組成，食落好香玫瑰味。仲有2月限定嘅心形法式馬卡龍，分別有玫瑰同雲呢嗱味，兩款買晒同情人share食啦，so sweet。
士多啤梨雪糕蛋糕 Häagen-Dazs
雖然呢排天氣凍，不過雪糕都係要食嘅。呢款士多啤梨雪糕蛋糕以紅色為主，配上蕾絲花紋，感覺優雅。套裝仲會送埋一條純銀手鏈，上面有「Love」、刻字圓牌同心型吊飾。連情人節禮物都幫你諗埋，買得過呀！
白草莓蛋糕 東海堂
呢款蛋糕選用來自日本九州，並只於每年一至三月出產嘅白士多啤梨，相當矜貴。白士多啤梨咬落清甜，仲有一陣獨特嘅香味。而蛋糕內層就有雲呢嗱慕絲同士多啤梨醬，酸酸甜甜，食多少少都唔會覺得膩。
法國焦糖蘋果果醬蛋糕 美心西餅
呢款蛋糕以蘋果為主題，感覺有新意。外形以粉紅色為主調，而入面就係由法國入口嘅焦糖蘋果果醬同白朱古力杏仁脆，再配上蘋果啫喱及蘋果慕絲。食落甜得嚟唔會好膩，仲帶點清新嘅感覺。
紅玫瑰蛋糕 聖安娜餅屋
唔少女仔都鍾意美女與野獸嘅故事，今年呢間餅店就以佢為靈感，設計出呢款紅玫瑰蛋糕。面頭有一朵絲絨紅色玫瑰朱古力，賣相高貴。而內層就係比利時55%朱古力紅桑子慕絲。朱古力味香濃，同紅桑子慕絲嘅酸甜味好夾。
文：Crystal