開飯仔溫馨提示，仲有唔夠兩個禮拜就到情人節，各位男士仲頭痛緊去邊度食情人節大餐？開飯仔幫大家搵咗6間提供情人節主題晚餐嘅靚景餐廳，各位搵到啱Budget又啱食嘅話，就記得快啲訂枱喇。
 

<$500/位　特色之選

尖沙咀甜蜜主題西餐　Uptop Bistro and Bar

「甜蜜回憶」五道菜情人節晚餐（$980/兩位）

位於尖沙咀一間酒店嘅19樓，居高臨下飽覽維港美景。而情人節晚餐以甜蜜回憶為主題。特別之處係主菜會有Specially for Him（烤澳洲 M5 和牛柳配烤美國大蝦）同Specially for Her（燴原隻波士頓龍蝦天使麵）兩款選擇。額外仲有以摩天輪造型呈上嘅精選小甜點，訂枱時可以要求用朱古力寫上指定字句！
 

灣仔東南亞風味晚餐　Tamarind Pan-Asian Restaurant & Bar

特色情人節套餐（$788/兩位）

餐廳位於灣仔，露天平台可以望到維港景色。而菜式以泰越印為主，二人情人節套餐包括頭盤拼盤、蝦冬陰功湯、主菜（炭燒三文魚配芝士烤餅及香料果仁時蔬，或泰式厚咖喱燒羊排配香蒜時蔬和椰子炒飯）同甜品朱古力慕斯蛋糕配印度芒果雪糕。如果唔想每年情人節都食西餐嘅話，不妨考慮轉下口味。
 

灣仔花香意大利美食　Assaggio Trattoria Italiana

情人節三道菜晚餐（18:00-20:00 $888/兩位）

同樣位於灣仔，呢間餐廳主打意大利菜，而且室內同戶外用餐區都可以清楚見到維港海景。而今年情人節套餐充滿花香，包括以食用花製作嘅花藝沙律伴紅莓汁，同以玫瑰點綴嘅士多啤梨意大利芝士餅。而主菜則可以從紅菜頭意大利飯伴芳提娜芝士、香煎鱈魚伴松露菠菜及薯蓉，同慢烤豬柳伴青椒忌廉當中任選兩款。
（另有20:30-23:00 六道菜晚餐$1,088/兩位）
 

$501-$1000/位　浪漫之選

尖沙咀海旁意大利餐廳　Spasso Italian Bar & Restaurant

情人節五道菜晚餐（20:30後供應 五道菜晚餐$778/位）

餐廳位於尖沙咀海旁，相隔一條馬路就係維多利亞港。而情人節當晚會供應五道菜晚餐，包括前菜檸檬魚子醬生蠔配上Grey Goose伏特加，而主菜就有海鱸魚配意大利櫛瓜薄荷紅莓醬，及慢煮牛柳配火箭菜青醬、風乾番茄薯蓉及芥末汁兩款選擇。最特別嘅係屆時會有漫畫家為情侶繪畫人象，幫大家留下甜蜜回憶。
（另有18:00-20:00 三道菜晚餐$558/位）
 

將軍澳無遮擋美景晚餐　星幕

「一夜傾心」燭光晚餐（$1,628/兩位）

而呢間餐廳位於將軍澳一間酒店嘅頂層47樓，飽覽開揚璀璨夜景。情人節套餐以一夜傾心為主題，呈現六道菜晚餐，包括帶紅酒同白酒香紅白海鮮啫喱凍，鮮甜嘅龍蝦清湯。而主菜就可以從烤牛肩胛扒伴炒蘑菇配黑車厘子汁、焗鰽魚柳伴乾番茄及橄欖，同澳洲小羊架伴紅蘿蔔配香草汁當中選擇。最後以浪漫嘅法式玫瑰香檳草莓脆餅作結。
 

中環浪漫法式盛宴　The French Window

情人節四道菜晚餐（18:00-20:00 $1,300/兩位）

餐廳位於中環嘅地標國際金融中心商場三樓，玻璃屋嘅設計唔單止呼應返餐廳名，亦令各位情侶都可以將維港景致盡收眼底。大廚以時令食材入饌，例如頭盤嘅雙色煮蠔。而主菜就可以選擇時令海鮮拼盤，或香煎和牛西冷配蘑菇及松露薯蓉。最後再以酸中帶甜嘅鳳梨多重奏，畫上完美句號。
（另有20:30-23:00 五道菜晚餐$1,800/兩位）

 

文：Cathy