平時食開乜嘢家牛丼，咩係牛重？「重」係一個長方型盛載食物器皿，通常都係漆器，比丼（碗）更高檔。我哋經常食嘅鰻魚飯，日本正式名稱就叫鰻重。而今次呢間由拉麵陳Meter Chen（陳方藤）開設嘅宗像牛肉屋，就主打牛重，比牛丼更高級嘅牛肉飯！
Meter上次開設宗像海鮮丼，將福岡宗像市嘅海鮮引入香港，早前去考察認識到當地Susuki牧場主人，食過呢一款宗像牛覺得唔錯，於是帶來香港。呢一款澳洲種但日本養殖牛，飼料以農場自家種植稻米為主，脂肪少而牛味濃郁，產量唔多只作內銷，今次係第一次運到海外。
Meter稱日本人已經唔再追求太肥太油膩嘅和牛，反而流行食牛赤身，宗像牛正好迎合當地飲食潮流。Meter試過五款部位，最後挑選大腿內側（即牛冧肉）同西冷兩個部位，效果最好。牛肉每兩星期來貨一次，原條熟成7至14日先煮，令肉味更濃縮、肉質更柔軟。
餐牌有兩款部位，亦可以揀雙拼，或者有較經濟嘅紐西蘭牛肉及美國安格斯牛肉。每款都係160克牛肉配250克飯，包漬物及味噌湯。
兩款牛肉部位做法唔同，大腿內側會先煎香外層，再放入真空袋低溫慢煮一個鐘，之後再切成2mm薄片，每一盒大約有21至22塊左右。肉質好柔軟，牛味重，食多幾塊都唔會膩。
日本宗像產大腿內側牛重 $168
西冷則會以250度高溫，用牛脂肪起鑊煎至5成熟，每邊20秒即成，再rest吓收緊肉汁，斜切放上飯面。西冷油份較重，味道香，但相對亦會較滯。
日本宗像產西冷部位牛重 $368
選用岩手一見鍾情米，大粒飽滿而且質感煙韌，淋上甜醬油係好味嘅。牛肉面層亦會塗上一層秘製醬汁，係宗像市有70年歷史醬油廠出品，再溝埋Meter自家調製醬汁，味道香甜，可以中和肉類膩滯。
其他細微位都做到足，好似伴碟嘅薯蓉加咗信州味噌同牛肉碎再燒香，蒜片炸得香脆又唔苦。自家醃漬物、黑豆茶可以解滯。連盛載牛肉飯嘅重，每款都唔同，係Meter親自喺日本搜購返來。
舖頭得16個吧檯位架咋，留意返長8米杉木枱都係來自宗像，一坐低就聞到木材香。牛重每日限量100碗，不設訂座，想食唯有排隊啦。
地址：大角咀利得街52號地下
文、相、片：Perrins