平時喺街上面想搵間飲品店，幾乎都係台式飲品或者果汁，不過今次元朗嘅街坊就多個選擇啦！呢間新加坡過江龍嚟到元朗開第一間香港分店，將當地超過50款飲品帶埋嚟，包括新加坡都係新出嘅芝士牛油果沙冰呀。
 

芝士牛油果沙冰（大杯$39）

NiHO里喝！前身為台灣品牌貢茶，不過今年年中已經取消合作自立門戶，由新加坡團隊新開發嘅芝士奶茶立刻成為熱賣產品。呢杯芝士牛油果沙冰喺新加坡亦係新推出嘅人氣飲品，用半個牛油果加上芝士醬等材料打成冰沙，冰沙幼滑無冰粒，芝士味亦相當突出，不過就出現「如果太多芝士味，牛油果味冇掟企」嘅情況，如果牛油果味可以濃郁啲就好喇。
 

芝士金萱茶（大杯$31，中杯$25）

另一新加坡熱賣嘅係芝士金萱茶，用嘅係荷蘭高達芝士(Gouda Cheese)，口感厚滑味道帶少少鹹香。同本身帶少少奶香嘅金萱茶非常夾，而品牌自家烘焙嘅金萱茶飲落亦有回甘。飲嘅時候可以先打開蓋試一啖芝士，再飲茶，品嘗過兩種味道衝擊之後再搞勻享用。
 

黃金柚子愛玉（大杯$28，中杯$22）

除咗芝士之外，飲品仲有多達10款配料可以任加，呢杯黃金柚子愛玉就加咗唔少香港人都鍾意食嘅黃金愛玉。杯裡面有唔少一粒粒嘅柚子，味道清香，酸酸甜甜咁幾討好。不過要注意嘅係呢度嘅愛玉嘅口感偏軟腍，想試Q彈口感嘅話或者就會失望喇。
 

里喝皇家觀音奶茶（大杯$27，中杯$21）

見到杯嘢特別加上品牌名，就知道係皇牌飲品之一。用鐵觀音茶代替紅茶，飲落味道的確比一般台式珍珠奶茶更清，而且無任何人工奶精味，抵讃。
 

 

蜜桃多多（大杯$32，中杯$24）

新加坡嘅多多係用Vitagen，嚟到香港就當然轉用大家細細個就飲嘅益力多啦。味道無想象中咁甜，有蜜桃香而唔會覺得太Artificial。當然啦如果你想再少甜啲嘅話，可以喺Order嘅時候講明甜度（100%、70%、50%、30%或0%），亦可以要求少冰或者走冰。
 

如果覺得元朗比較遠嘅話，好消息嚟喇：品牌計劃喺10月底或11月初喺觀塘開第二間分店，各位港島同九龍嘅朋友想試嘅話就更方便。
 

NiHO 里喝！
元朗青山公路22-26號金源大廈地下1號舗

文、相、片：Cathy