熱辣辣又要食雪糕，凍冰冰又要食雪糕！仲要有間集齊好多款日本人氣雪糕嘅雪糕店今日新開業，CREMIA軟雪糕、NISSEI濃厚系列等等都有得食喎，幾多度都要食啦，下話？

新店喺尖沙咀開張，總共會引入3個日本系列，夾埋成14種款式嘅雪糕，有選擇困難症嘅朋友唔好問我點揀，我都幫唔到你，自己睇圖決定啦。

CREMIA軟雪糕

cremia雪糕，即係波浪形嗰隻呀，用25%北海道鮮奶油製成，所以奶味好香濃同埋好軟滑，而甜筒就係鬆化嘅法式餅乾曲奇。除咗原味之外，仲有首度喺香港推出嘅金箔、宇治抹茶同朱古力味！是咪好開心？喺北海道牛奶雪糕上撒上宇治抹茶粉，甘甜香濃，抹茶怪實鍾意，不過小心被啲粉嗆親。

但最開心一定係榴槤迷！因為會有隻金枕頭榴槤味呀！係香港首創，連日本都未有㗎 OMG！同樣係喺雪糕上撒上榴槤粉，係香嘅。留意返cremia雪糕溶得堅快，快手影兩張相好食喇。

NISSEI軟雪糕

呢個牌子對雪糕迷嚟講應該都唔會陌生，新店會有朱古力味同特選宇治抹茶味，鍾意兩溝嘅都得，甜筒亦可以揀原味或者朱古力味。On top仲可以加toppings，少女系粉紅朱古力花、朱古力蝴蝶仲有朱古力雞蛋餅仔之類，有隻爆炸糖脆脆幾得意，食住雪糕但又會有爆炸糖嘅感覺，過癮。

JAPAN PREMIUM清新水果雪糕

呢個系列都係用日本新鮮當造嘅生果製嘅。時令嘅係山形縣西洋梨味，有成30%果汁成份，果味相當突出，清新清甜。士多啤梨軟雪糕都有25%果汁成份㗎，開飯仔試過真係甜到入心，係果甜嘅甜呀。而之後會有其他唔同時令嘅果味例如福岡甜王士多啤梨、山形縣佐藤錦櫻桃等，同樣都係可以貪心啲揀兩溝！

軟雪糕以外，仲有幾個雪糕櫃，日本雪條、雪糕三文治、雪米糍、沙冰、忌廉泡芙等等嘅冰品，通通都可以喺度搵到，大滿足！呢個刨冰幾推介，芒果味，甜得嚟冰感亦十足，連啲生果都係超冰感！同場仲有其他日本零食同魚餅。

預告定，12月2、3號下晝1點同6點，佢哋都會分別送50杯日本濃厚系列特選抹茶軟雪糕呀！

日本雪糕物語by Okashi Land
地址：九龍尖沙咀金馬倫道8號地下

文、相：Kar