愛好日本料理嘅朋友仔，都會鍾意不時不食嘅Omakase，而中環呢間專門店係日本米芝蓮餐廳、百年老店嘅姊妹店，出品有一定水準。現時新推嘅「矜貴日式刺身料理春季晚餐」，包括季節刺身盛合、天婦羅盛合、串燒盛合等，無論款式同食材都相當多元化！

矜貴日式刺身料理春季晚餐

珍味先付九方

平時嘅開胃菜大約3至5款，但呢個套餐則多達9款！大部分款式為清新口味，如加入蟹肉嘅茶碗蒸、鰹魚沙律、魚籽配冷豆腐等，另外炸柳葉魚則香口惹味。

季節刺身盛合+卷物

食日本菜點少得刺身同壽司呢～5款厚切足料嘅刺身選用時令海鮮，油甘魚、帆立貝、甘蝦、縞鰺等都有機會試到。卷物方面有真鯖棒壽司、金槍魚卷同穴子芝士卷，一次過試到傳統同新派口味。

天婦羅盛合

香口菜式人人都鍾意，呢份升級版天婦羅盛合以鮑魚、海蝦、舞茸同粟米入饌，海鮮嘅鮮味同蔬食嘅清甜味相得益彰。

串燒盛合 

串燒係日式料理中重要嘅一環，套餐包括燒得啱啱好嘅磯燒日本蠔、爽滑嘅雞腿肉配青橘味噌、 香口嘅豚肉車厘茄配紫蘇梅醬同蔥塩手羽先，最後有焦糖沖繩菠蘿解油膩感。

主食二選一 ／ 升級轉款式

套餐包括一款主食，有鮮味嘅角切刺身丼，或帶油香嘅薄燒日山A5和牛丼。但如果你係蟹「粉」，可以現場升級（加$358）轉做日本季節蟹燉飯！時令蟹款拆肉後鋪上蟹膏，而軟糯嘅燉飯吸收蟹嘅精華，味道更加清香。

甘味

收尾嘅日本菓子選用日本當造水果，拍攝當日嘅哈密瓜清甜解膩好refresh。

加配叮唎酒師精選清酒配搭體驗，風味更突出

裝潢融合日式舟屋同竹林元素，氣派有特色，亦設有私隱度高嘅席前VIP房

月山   
地址：中環皇后大道中80號H Queen's 19樓

文：Cathy.C
相：Michael
片：Tom