呢間連續五年榮獲日本丼聯盟天丼金賞獎嘅人氣天丼、天婦羅專門店天吉屋終於登陸旺角啦！天吉屋來自東京、創業於2013年，香港分店亦秉承品牌堅守嘅理念，希望以大眾化價錢，令客人品嘗到日本原汁原味嘅天丼。
年年都拎獎，天吉屋嘅天丼有咩過人之處呢？首先講下天婦羅，秘製粉漿以多種麵粉混合而成，炸油嘅溫度都要調較得啱啱好，咁先可以炸出香脆而唔油膩嘅天婦羅。而天丼醬汁亦都係自家秘製，味道鹹鹹甜甜，越食越開胃。另外天吉屋採用的米飯都大有來頭㗎，使用北海道七星米，每粒米都大而晶瑩剔透，煮出嚟嘅米飯粘性低，就算凍咗食都一樣咁好味！
招牌天吉丼($118)，呢個就係已榮獲連續五年日本丼聯盟天丼金賞獎嘅丼飯，材料包括黑虎蝦、茄子、四季豆、海紅鯛、魷魚、溫泉蛋、炸紫菜同南瓜，廚師為咗增強鮮蝦嘅彈牙口感，特意將兩隻鮮蝦合拼炸成天婦羅，雙重幸福感啊喂！
香港限定軟殼蟹丼($158)，軟殼蟹由越南空運到港，啖啖都係鮮甜蟹肉；皇帝菜配搭櫻花蝦炸成餅狀，爽脆鮮甜之餘仲鹹香惹味。
All Star丼 ($108) 有齊海鮮、鮮肉同蔬菜類別，滿足一眾貪心鬼嘅慾望。
鍾意唔同食法嘅就可以試試呢個天幕御膳($148)，除咗天丼外，仲可以試試天茶漬飯呢個食法。
天吉雙品($108)包含一個細丼飯同日本空運抵港嘅讚崎烏冬或稻庭烏冬，鍾意凍食定熱食由你話事。
地址: 旺角亞皆老街8號朗豪坊11樓25-29號舖
文、相、片: Yanica