成日都聽到啲人話，好葡萄人哋隔籬國家嘅便利店，有好多好嘢食，一陣間又布甸麵包，一陣間又tsum tsum咖啡咁。其實香港嘅便利店都一樣有寶㗎！就等開飯仔同大家一齊去尋寶啦！雖然而家嘅天氣都仲凍凍地，但係呢一兩個月依然有好多新款雪糕推出，仲要不約而同都係芝士口味添！芝士控即睇報告啦。

韓國 樂天tiramisu雪條

Tiramisu由蛋糕進化到雪條，都一樣係咁吸引，依然係分咗幾層，由外到內到返外，分別係厚厚der芝士雪糕、薄薄der朱古力雪糕，同一層流流地心嘅咖啡糖漿，翻啅度幾高。特別係層芝士雪糕嘅味極濃，心心眼咗。

價錢：$18（7-11）
芝士濃度：*****
推介度：*****

韓國 樂天tiramisu雪糕

Tiramisu有雪條都有雪糕，同樣係韓國製嘅。成個外形同普通Tiramisu冇乜分別，面頭一樣有返層朱古力粉，最驚喜係最底嗰層仲有真‧蛋糕添，食嗰陣記住要一嗶嗶到底呀！一啖食晒4層，先至perfect池。

價錢：$20（7-11）
芝士濃度：****
推介度：****

日本 意大利芝士雪條

呢款tiramisu雪條，就係由日本進口嘅，最外面嗰層係朱古力脆皮，包住芝士同咖啡雪糕，但相對嚟講，芝士味就冇韓國嗰兩條咁濃郁喇，比較淡，不過咖啡味係香嘅。而且佢雖然都係由芝士同咖啡雪糕組合而成，但因為佢嘅分層係一層芝士一層咖啡再變返一層芝士咁樣排列，變咗無論你個口幾大（除非你一啖食到成條啦），都冇可能食到tiramisu嘅感覺，只係分別食緊芝士雪糕同咖啡雪糕咁。

價錢：$22（OK便利店）
芝士濃度：**
推介度： **

日本  Kiri芝士大福

芝士控就好啦，連大福都有芝士味！最面層嘅糯米皮薄薄地但幾煙韌，冰箱拎出嚟記得要攤陣先食，都幾硬下。芝士味都算濃嘅，仲有些少酸，食到尾呢又會有微微嘅煉奶甜味滲出嚟，大體感覺似係芝士乳酪嘅朋友。睇返成份，原來有lemon juice呀。

價錢：$15.9（OK便利店）
芝士濃度：****
推介度： ***

日本 士多啤梨芝士味     Haagen Dazs

Haagen Dazs嘅雪糕一向都有保證，特別係士多啤梨味就更多得人鍾意，今次呢款仲要加埋芝士味，仲要係日本限定直送過嚟嘅，好吸引！4月先正式有得賣，開飯仔率先幫大家試咗先。首先食到嘅會係士多啤梨層脆皮，保持一貫香甜嘅水準，而中間嘅芝士雪糕，就愈食愈香濃，芝士控表示食得好開心，只係唔知點解中間明明應該有流心醬嘅，呢條冇，嗚呀！

價錢：$39
芝士濃度：****
推介度：*****

文：Kar
相：Kar、Cathy