越南餐廳就見得多，南越Fusion嘅又見過未？旺角呢間樓上Cafe主打南越南Fusion菜式，有大家常見嘅牛肉粉、越南法包，亦有平時少見嘅越南街頭小食，糅合創意同唔同烹調方法。仲有香港首見嘅炸米粉塔同越式蛋啤酒！
 

NAM VIỆT NAM Café由知名主廚Justin（陳希裕）主理，師承米芝蓮星級大廚，嫲嫲係老撾皇族後裔。今次新店嘅招牌牛肉粉，湯底就係傳承自嫲嫲嘅食譜，經歷南越南、老撾、法國等口味影響，再加以改良。
 

[嫲嫲南越湯]招牌金邊粉（$88）

湯底用牛面頰、牛尾等五個部位，熬製足24小時，味道鮮甜濃郁，加埋香料感覺更清爽。配料就有有牛肉片、牛面頰、牛腱、牛筋、牛肉丸同油炸鬼，牛肉片嫩滑，牛筋軟腍充滿膠質，油炸鬼更加係索晒湯底精華！連金邊粉都特別空運到港，口感細滑爽彈。配是拉差辣椒醬同甜醬，不過開飯仔就覺得唔使點醬都好夠味。
 

烤蔞葉雞配青蘋果條（$98/全隻，$78/半隻）

以南越南經典菜式蔞葉烤肉卷為靈感，改為烤雞配搭以蝦頭油炸嘅青蘋果條。蔞葉帶少少胡椒香氣，可以帶出肉香，而烤雞口感皮脆肉滑，有油香而唔肥膩。蘋果條聞落有濃郁蝦香，食起嚟味道鹹鹹辣辣咁，蘋果本身嘅酸甜果汁平衡返，整體香口得嚟而唔會太重口味。
 

慢烤煮12小時乳豬配生菜包（$180）

烤乳豬亦係越南常見傳統美食之一，餐廳就加入近年興起嘅慢煮方法加以改良，將乳豬先低溫慢煮12個鐘，再放入焗爐烤香。乳豬皮夠薄夠脆嘅同時，豬肉又保持到嫩滑多汁。
 

NVM南越法式麵包配肉湯（$78）

越南法包配料豐富，包括自家製黑啤酒豬肝醬、豬耳、燻蹄、扎肉、酸菜、香葉、蔥花等，食落口感層次非常豐富，法包外脆內軟、豬耳脆嫩、豬肝醬香滑、酸菜爽口。仲會附上牛肉湯，等大家可以好似法國人咁將法包點湯一齊食。
 

NVN高樓米塔（$48）

呢座白色小山丘其實係炸米粉，將越南米粉炸脆後疊高，食之前先淋上加入香茅、青檸葉等香料嘅濃湯，好玩之餘又獨一無二。
 

 

Shake Shake雞軟骨（$42）

小食同樣都具備好玩元素，呢款Shake Shake雞軟骨用紙袋裝住，裡面已經有炸雞軟骨、蒜香調味粉、青檸葉、香茅等調味，上枱後再按自己口味加入辣椒粒同青檸汁，Shake勻之後再倒出嚟食。雞軟骨外酥內脆，香辣惹味，加上青檸汁酸酸哋更醒胃。
 

五香豬腩伴鍋巴（$48）

五香豬腩口感甘香鬆化，而且相當入味。配搭香脆嘅鍋巴一齊食，口感層次豐富。
 

脆米紙薄餅（$48）

靈感嚟自街頭小食越南煎餅，但將餅底改為炸米紙口感輕薄香脆，配搭越南香腸、蝦乾、秘製酸瓜，同檳榔葉等，味道豐富。
 

南越蟹肉醬配脆球餅（$68）

另一款香口小食推介，食法係將蟹肉醬釀入脆球餅再食，外層酥脆唔油膩，裡面嘅蟹肉醬味道酸酸甜甜富蟹肉香。
 

南越蛋咖啡（$28）

南越蛋咖啡表面係有焦糖脆面嘅蛋醬，記得唔好攪勻就咁飲，會先飲到焦糖甜香，然後係蛋醬嘅雞蛋味，最後係咖啡嘅濃郁醇香。蛋醬口感柔滑輕盈，有啲似奶蓋咁。另附一小件綠豆糕，配搭起嚟更突顯甜味，當飲品得當甜品亦得！
 

越式蛋啤酒（$38）

餐廳係香港首間引入越南蛋啤酒嘅，飲嘅時候將越南啤酒倒入裝住自家製蜂糖蛋醬嘅玻璃杯中。綿滑香甜嘅蛋醬同清爽嘅越南啤酒真係好夾！
 

越南手工啤酒（$48/樽）

唔飲蛋啤酒仲有越南Heart of Darkness嘅手工精釀啤酒，First Sunset係加入越南金桔釀製嘅Pale Ale，帶柑橘香氣；Futile Purpose就落咗青瓜，酒體清爽；Marlow's Mellow係IPA，帶柚子香同草本苦韻。
 

微藻檸檬薑茶（$28）

見到藍色唔好以為又係蝶豆花，其實係一種有助抗氧化嘅微藻，漸層效果非常搶鏡。
 

NAM VIỆT NAM Café
地址：旺角彌敦道726號1樓

文、相：Cathy