呢間樓上咖啡店請嚟專業花藝師設計，天花板掛滿唔同種類、顏色嘅乾花，窗邊同樣用乾花裝飾，滿室花香。一角有盞月球燈高掛，真係成間餐廳都係打卡位！雖然係咖啡店，但食物選擇亦多元化，糅合日、台、意、法菜，並非一般主題Cafe咁簡單。
 

走過十萬八千里找到你呢個店名聽落好有台灣文青Cafe Feel，其實係香港人喺旺角開嘅樓上咖啡店，真係「走過十萬八千里」嘅係指嚟自各地嘅食材，包括法國、日本、台灣等。環境恬靜而且有大玻璃窗，中午有自然光影相都靚啲，夜晚喺燭光當中又係另一個Mood。
 

豐滿的早餐（$128，17:30前供應）

有黑松露炒蛋、煙三文魚、煙肉、薯餅、有機沙拉、牛角包、大啡菇等，非常豐富。炒蛋採用日本可生食雞蛋，滑溜有蛋汁而且完全唔油，黑松露醬香氣濃郁。紐西蘭煙三文魚有油香，大啡菇香濃Juicy。
 

龍蝦。牛角包（$108，17:30前供應）

用本地海鮮檔買嘅新鮮龍蝦拆肉，肉質結實彈牙。醬汁有蟹籽、洋蔥、Wasabi，所以有顆粒感，味道帶微辛、幾刺激。牛角包就由西貢一間烘焙店供應，鬆軟富空氣感，而且攞上手完全唔油，配埋有機沙拉菜當Tea嘅話，份量啱啱好。
 

明太子。岩鹽燒蟹棒。三文魚籽。貓耳朵（$138）

一上檯就聞到好香嘅明太子香味！明太子鹹辣香味突出，三文魚籽落得夠爽手，一粒粒喺口腔裡面爆發鮮味，加埋爽口嘅洋蔥好過癮。岩鹽燒蟹棒有一絲絲蟹肉口感。而貓耳朵係一款造型似貓耳嘅意粉，細細粒而且夠掛汁，啖啖都食到明太子味。而意粉選用意大利超過80年歷史品牌阿布素出品，軟硬適中。
 

 

黑糖。紅豆。煉奶。綠茶冰淇淋（$78）

紅豆、黑糖蜜、綠茶雪糕都係嚟自日本，雪糕有綠茶清香、甜度適中，粒粒紅豆一咬就化成沙。不過窩夫口感偏軟身，勝在唔過甜，同雪糕、紅豆都好夾。
 

走過十萬八千里特調花茶（$76/熱）

由專業花藝師、茶藝師調配比例，裡面有七款唔同嘅花，全部100%有機純天然，包括台灣特級金桂花、法國薰衣草、大馬士革玫瑰、台灣頂級胎菊，各有唔同功效，好似美容養顏、紓解壓力、清熱解毒等，女孩子最愛。聞起嚟以玫瑰同菊花香為主，帶淡淡甜味。
 

鮮奶抹茶（$56/熱，$60/冷）+大粒燒棉花糖（+$5）

選用京都小山園抹茶粉沖調，灑上食用玫瑰花瓣點綴，未飲就先聞到優雅嘅花香。鮮奶抹茶入口微甜，口感柔滑，回甘唔算強烈但悠長。加埋大大粒嘅棉花糖，記得影相呃Like！順帶一提，呢度嘅咖啡豆亦由本地炒豆師配搭，真係落足心機㗎。
 

走過十萬八千里找到你
地址：旺角彌敦道575號Ladder Dundas10樓

文：Cathy
相、片：Calvin Kwok