紮根於香港超過 50 年嘅時新快餐店，突然喺 Facebook 宣佈停業，令一班吃貨都心傷！以後仲可以喺邊度食到港式漢堡包呢？暫時冇得食時新，唯有轉軚其他食店頂住檔先，睇下開飯仔5大港式漢堡店推介啦！

港島區時新　樂景快餐店

位於灣仔的樂景快餐店，素有「港島區時新」之名，有近百款美食選擇，但最受食客歡迎的，始終都係港式漢堡系列，最平的漢堡包只係 $12 個，而芝士蛋漢堡包更是無得輸，漢堡扒彈牙、流心蛋汁夠香滑、漢堡邊更被烘得帶點焦脆，再加上洋蔥、茄汁，難怪是必點 item！

圖：chrischow3105、oct.

傳統 + 創意並行　嘉寶小食

老闆鎧哥用 fine dining 方式炮製港式漢堡，以來貨較貴的牛肋條切碎，製成漢堡扒，並且以慢煮方式煮漢堡扒，令肉質軟腍之餘仍保留彈牙多汁的口感，最正的係整個漢堡 size 細細，唔使分拆咁食，女生都可以一口咬晒。另一方面，店子不時會有新式漢堡如蜜糖芥末菠蘿豬堡、紫菜肉鬆豬堡、雙層泰式蝦堡等等，完全滿足貪新鮮的客人。

 圖：sweet sweet April、BAMBOOYO

真‧港式漢堡　丹麥餅店

1958 年起開業至今，係香港碩果僅存的老式餅店之一。店中除咗有馳名的豬扒包、雙腸熱狗外，漢堡包亦係抵食又飽肚之選。漢堡扒即叫即煎，配以沙律醬、番茄醬就食得。最特別的係漢堡用上港式麵包，口感比較軟腍，好地道，係真正的「港式漢堡」。

 圖：Zoe chui、Hidedead

超 Juicy 牛堡　添福小食

只做外賣的添福小食，以手打黑椒牛肉漢堡而出名，食客們大讚牛味夠濃，店子醃製牛肉時保持低溫去處理，成功鎖住肉味、肉汁，價錢都只係 $18/個，大件夾抵食！不嗜牛的，可以改試以光波爐炮製的雞扒包，食落無咁油膩，雞肉亦嫩滑。

圖：chuloveschu、DorDorLoo

西灣河巨型豬扒包　星河

名氣雖然無時新、樂景咁強勁，但呢間小店喺西灣河區內好有口碑。馳名豬扒包好搶眼，因為 size 大大個，單單豬扒就已有成吋厚，口感實在又夠鬆化，加上佈滿芝麻的漢堡包、酸香清新的自家製芥茉籽醬，香口之餘不太覺油膩。

圖：michaelhing、LaiLeeChu

文：Joy