喺香港講到食米線，唔少人都會諗起某一兩間連鎖店，但其實仲有好多其他選擇㗎！旺角最近就新開一間過橋米線專門店，由負責人Wendy及佢媽媽母女檔開設。並唔係我哋平時見到將多款配料放晒入一個大碗中嘅過橋米線，而係跟足雲南當地食法，所有配料都即席呈上，為保持溫度，湯底會用砂鍋盛載，食嘅時候先將配料及米線放入，咁就包保由頭食到尾都熱辣辣！
Wendy提及，其實雲南當地嘅過橋米線口味都好多變， 而餐廳就偏向雲南家庭口味，亦有加入少許香港特色。如配料方面，加入香港人最鍾意嘅魚腐及響鈴等，亦有供應傳統嘅雲南酸菜、酥肉及炸醬。
香格里拉豪華配料套餐($128)
過橋米線套餐就有三款，每款都有十一個餸。價錢方面豐儉由人，最平由$88至$128，湯底方面就可以自由選擇。呢個香格里拉豪華配料有牛肉或豬腩片、鵪鶉蛋、炸醬、酥肉、響鈴、竹笙、蟲草花、蝦、鮑魚、帶子及芫荽蔥。食法呢就依次先將肉類及鵪鶉蛋放入，然後加入其他配料，最後先放米線或七彩麵，兩者都有咬口唔會過腍。
所有湯底都以雞湯為基底，根據雞隻大細約用6-10隻雞熬製6小時。老壇酸菜湯選用自家醃製酸菜，香氣聞落味道就較重，但食落又唔會太鹹，酸味又幾突出。
更多【新店直擊】： |
而雲南特色湯就係雞湯底 +自己調製嘅酸辣醬汁，味道酸酸辣辣夠晒惹味。番茄湯就偏向香港人口味，用番茄蓉+新鮮番茄製成，茄味好濃郁。
昆明風味配料($88)
至於想經濟實惠啲，就可以食呢個$88嘅套餐，配料有牛肉或豬腩片、鵪鶉蛋、炸醬、酥肉、響鈴、魚腐、粟米、酸菜、餐肉、番茄仔及芫荽蔥，一樣係十一個餸，好抵食！
酸菜拌飯($68)
酸菜米線就聽得多，酸菜拌飯就真係少啲聽啦。酸菜拌飯係家鄉菜，加入秘製醬汁、芫荽、芹菜、花生、花椒油、辣椒油及芽菜拌食，味道又酸又麻，熱食凍食都無問題。
麻辣鬼魅雞($78)
同樣都係家庭菜式 ，將雞扒切粒後加辣椒粉及花椒粉炒成，香濃惹味少少辣，而且啖啖肉，送飯最啱！
地址: 旺角彌敦道724-726號18樓
文: Yanica
相、片: Tom Li