泰式奶茶控尖叫吧：有超過70年歷史嘅泰國茶葉品牌ChaTraMue開到香港啦！泰式奶茶、泰式綠茶，同近年力推嘅玫瑰花茶等應有盡有，而且奶茶仲可以變雪糕，呢個夏天想消暑有多個選擇啦。
ChaTraMue又叫手標牌，因為Logo係一個用手比Like嘅圖案，唔少人去到泰國都必飲必買，而且去銅鑼灣都飲得到！沿用泰國師傅來回撞茶九次嘅方法，將茶葉香味充分發揮出嚟。茶葉、煉奶等材料都嚟自泰國。
正宗泰國奶茶（$29）
紅茶茶葉嚟自品牌泰國北部自家茶園，特別之處在用咗幾款唔同紅茶茶葉配出品牌獨一無二嘅茶種，所以茶湯顏色偏橙。加埋淡奶、煉奶就係一杯正宗泰國奶茶。知道香港人口味無泰國人咁愛甜，所以香港飲品甜度全部經過調整，香港店嘅正常甜大概係泰國店嘅少甜（約70%），當然亦可以再要求少甜少冰。不過為咗呈現正宗口味，就唔可以走冰或者走甜喇。
正宗泰國綠奶茶（$29）
綠茶同樣嚟自自家茶園，比起近年大家成日飲嘅日式抹茶味道更清，少一分回甘，平時怕抹茶苦嘅朋友就可以試呢杯啦。
泰國玫瑰花奶茶（$32）
品牌近年力推嘅飲品，粉紅色奶茶加上花杯非常有少女感。玫瑰茶秘方用咗品牌自家種植玫瑰，花香濃郁。而且泰國人相信玫瑰茶有放鬆同Detox嘅功效，所以相當受OL歡迎。
（左至右）雙拼、泰國奶茶雪糕、泰國綠茶雪糕（各$25/杯，可選擇雪糕筒裝）
唔飲奶茶亦可以食軟雪糕！暫時有泰國奶茶雪糕、泰國綠茶雪糕，同兩款口味雙拼。負責人表示稍後計劃加埋玫瑰花奶茶口味。
更多【新店直擊】： |
泰國班蘭珍珠抹茶鮮奶（$38）
多款泰茶更可以加入班蘭碧綠珍珠或特製仙草（+$5），好似呢杯抹茶Latte就加咗綠色嘅班蘭珍珠，珍珠從泰國入口，用泰國新鮮班蘭葉製造，聞落有淡淡班蘭香味。而且口感煙韌，香草味同平時食開嘅黑珍珠或者白珍珠好唔同。
正宗泰國朱古力奶（$29）
泰國朱古力咖啡（$32）
香港店大部分原材料都係品牌喺泰國北部自家種植同製作，包括呢兩杯用到嘅咖啡豆同谷古粉。咖啡香氣突出，值得一試。飲品方面負責人透露，雖然暫時未有香港限定飲品，但希望遲啲會推出唔同期間限定嘅口味，滿足香港消費者需要。
銅鑼灣店亦出售ChaTraMue茶葉，送禮自用都啱。
ChaTraMue
地址：銅鑼灣渣甸街49號地舖
文、相、片：Cathy