深水埗多平民美食是常識吧，好似呢間新開嘅小食店主打嚟自台灣，喺大陸同澳門都好紅嘅黃金拔絲蛋糕，搣開有拉絲效果又鬆軟！仲有色彩繽紛嘅低糖冰鎮砵仔糕，無論係掃街定買返屋企開心Share都咁啱。
 

榮家糕點烘培店舖仔細細，但拔絲蛋糕堅持每日新鮮出爐。呢款拔絲蛋糕嚟自台灣，近年喺內地多個城市同澳門都成為「網紅」點心之一！店主同太太就喺杭州一試難忘，特別拜師學藝後就返嚟香港，喺深水埗賣起呢款蛋糕。
 

牛油味黃金拔絲蛋糕（$12/三件，$45/一打）

牛油味即係原味，拔絲效果原來係嚟自加入特別幼細嘅雞肉絲，店主仲將原本嘅食譜改良味低糖配方。食落牛油香幾濃郁，口感鬆軟得得嚟又有少少煙韌，夠特別。
 

抹茶味黃金拔絲蛋糕（$12/三件，$45/一打）

除咗牛油原味之外，店主仲特別設計咗四款新口味！抹茶味用台灣抹茶粉，搣開同樣有拉絲效果㗎。味道方面蛋香同抹茶味各半，唔會太甜。
 

芝士味黃金拔絲蛋糕（$12/三件，$45/一打）

而芝士味就加入意大利巴馬臣芝士，聞落有芝士香，食起嚟芝士香唔會好霸道，帶少少鹹香。另外仲有提子乾牛油味，同用咗馬來西亞朱古力嘅朱古力味。
 

 

冰鎮椰汁紅豆砵仔糕（$8/件，$21/三件）

店家亦有冰鎮砵仔糕，4℃冷藏食落有透心涼感又唔會凍到好似食雪條咁。最傳統嘅椰汁紅豆口味食落幾有椰汁香，口感介乎啫喱同蒟蒻至今，滑溜彈牙食落又有少少煙韌感。
 

冰鎮桂花砵仔糕（$8/件，$21/三件）

冰鎮紅石榴砵仔糕（$8/件，$21/三件）

除咗傳統口味，小店亦有花味同水果味，共超過10款口味畀大家任揀。桂花食落有淡淡花香，仲有一粒粒桂花口感。而水果味就係用果凍粉加台灣嘅濃縮果汁製成，唔添加人工香精，甜度適中。色彩繽紛，無論小朋友定大人，甚至老友記都可以一試。
 

榮家糕點烘培店
深水埗桂林街50A號地下2號舖

文、相、片：Cathy