又到一年一度學生覺得最開心嘅暑假喇，想可以一家人開開心心食餐飯，唔洗全程忙住照顧小朋友？開飯仔之前幫大家搵過10間親子餐廳，今次再介紹多6間，遍佈港島九龍新界，呢個暑假就唔洗再頭痛！
新蒲崗海洋主題Play House 白海豚咖啡
位於新蒲崗大型商場裡面，屬於親子Playhouse加餐廳，有一個大型嘅波波池可以畀小朋友盡情玩！遊樂區都有軟墊，而且亦有唔少玩具選擇。嚟到用餐區餐廳亦貼心地準備咗畀BB用嘅即棄圍巾同BB櫈。餐點以西餐為主，有意粉、Pizza、小食等選擇。不過要留意嘅係收費方面係收取入場費，再送餐廳現金券嘅方式，整體定價偏高。
觀塘工廈波波池西餐廳 Unique Café & Kitchen
圖：ram
呢間雖然唔係打正招牌做親子餐廳，但因為餐廳盡頭有個遊戲室，只要先電話訂座，平均每人消費達指定最低金額，就可以畀小朋友入去任玩。遊戲室有波波池同三條滑梯，餐廳亦會限制人數。不過因為用餐區同遊戲室距離比較遠，年紀比較細嘅小朋友建議都由大人陪同。Menu有沙律、肉扒、意粉同飯等，亦有迷你漢堡配水果等嘅兒童餐。
西環美國菜Kids Kitchen Butcher & Baker Cafe
圖：poorcat
各位家長放心，呢度嘅Kids Kitchen唔係指要小朋友親自下廚，而係餐廳特別劃出一角，畀小朋友任食雪糕、曲奇、糖果等。另外有Play Corner畀好動嘅小朋友，兒童餐Menu後面亦有填色遊戲等畀好靜嘅小朋友。家長們可以安坐係梳化中，靜落嚟好好享用餐廳嘅美國菜，包括凱撒沙律、香蒜蜆肉意粉等。亦可以幫小朋友點一份兒童餐，咁就大小朋友都滿足啦。
更多【開飯專題】： |
荃灣小熊主題餐廳 熊小館
相信呢度唔單止會令小朋友樂而忘返，隨時連大朋友都唔捨得走，因為呢間西餐廳以熊為主題，擺滿哂大大細細唔同造型嘅熊啤啤公仔，啱哂鐘意影相嘅爸爸媽媽們。而且餐廳空間寬敞，唔單止有個迷你圖書館可以畀小朋友借書睇，仲方便家長擺BB車同BB櫈。以餐點就以西餐為主，亦有亞洲風情套餐同小熊兒童餐。
旺角連鎖餐廳連Playground 意粉 360
呢個品牌喺其他地區都有分店，不過就以旺角呢間最就腳，而且設施亦最完善。既有齊BB櫈同小朋友專用餐具，另外仲有個Playground擺咗一啲煮飯仔玩具。不過Playground唔算太大，而且餐廳無消毒洗手液同洗手間，建議家長自備返消毒濕紙巾。食物以西餐為主，亦有日式西餐選擇。有需要點兒童餐嘅話需要提早一日電話預訂。
沙田意菜館連遊樂場 Meraviglia Bar e Ristorante
如果餐廳裡面嘅Play Corner都滿足唔到家中小朋友嘅好動活潑，咁就要去遠少少，入沙田科學院呢間意大利餐廳喇。因為唔單止戶內用餐區有小型遊樂設施同圖書角之外，連戶外都有彈彈床同滑梯等設施，最啱畀小朋友「放電」！餐廳有個大型Pizza烤爐，可想而知佢地嘅Pizza水準唔錯。不過唔少食家都話店員服務態度麻麻，而且菜式單價偏高，值唔值就見仁見智喇。
文：Cathy