召喚沾麵控！喺上星期五灣仔啱啱新開咗間日本過江龍沾麵店呀！走嘅係豚骨魚介風路線，而且一碗湯底仲可以有4種食法，都幾多變化下。

沾麵嘅靈魂就係在於個湯底，呢度嘅豚骨魚介湯用咗兩種豬骨湯混合而成，分別係用豬骨、雞骨熬嘅湯底同100%碎豬骨熬嘅湯底合製，另外再加魚介粉、沙甸魚油、魚介醬油去熬製，到食客落柯打嗰再逐碗新鮮加現場即磨嘅魚介粉，所以「豚骨魚介湯」無論係豚骨味定魚介味都超級濃郁。

不過老老實實，頭幾啖食就覺得濃郁香口，但食多幾啖就會開始覺得係重口味同埋有啲鹹。呢個時候，建議可以唧啲檸檬汁落去，即刻變fresh亦得，得咗。食晒啲麵之後，就可以加埋魚介水，當湯咁飲，魚介味就更加之突出。而第4種食法，就係如果你仲有quota仲食得落嘅話，可以追加多碗香鬆飯，倒埋落個湯度食，又係另一返風味。

湯底除咗豚骨魚介湯，另外仲有一捧出嚟就聞到好香嘅咖喱豚骨魚介湯，同專for辣鬼嘅辛辣豚骨魚介湯，嗰隻辛肉爆彈堅係刺激呀，就算平時食開少辣嘅朋友都係唔好充大頭鬼喇。

另外，麵條同麵嘅份量都有得揀。溫麵相對腍身少少，而冷麵就比較煙韌有嚼勁。Size嚟講，並盛（200g，正常女仔食量）、大盛（300g）同特盛（400g）嘅價錢都係一樣，視乎返你個胃有幾大而嗌啦，最緊要唔好做大嘥鬼。當然，如果你超級肚餓，或者係大胃王，可以加少少錢叫個富士山盛嘅，800g，堅大碗呀！

呀，爭啲唔記得講，記得留返少少位，食雪糕呀。係日本米雪糕呀，幾新奇。牛奶味幾重嘅，但嗒真啲，會食到一粒粒米呀。

風雲丸
地址：灣仔軒尼詩道314-324號W Square地下B舖

文、相、片：Kar