冬天打邊爐特別有feel，今次同大家介紹嘅2間火鍋店，各有特色。一間主打雞煲加火鍋放題，咩都有得食；一間懷舊裝修、自家熬煮湯底作招徠。重點係，兩間都會供應高質靚牛同時令海鮮，食完唔止暖笠笠，仲大滿足。

人和月雞煲火鍋店（尖沙咀） 

天氣轉冷，打邊爐定食雞煲？ Why not both？尖沙咀呢間餐廳，主打港式同川式口味嘅雞煲同火鍋放題，食完一樣再一樣，唔使揀！火鍋配料選擇多元化，茶水任飲之餘仲要有自家製嘅蜜糖水同冷泡茶等，夠晒誠意。

招牌麻辣雞煲

冬天食辣可以暖身，食得辣朋友仔不妨試下招牌麻辣雞煲。餐廳已經根據香港人嘅口味調整過雞煲嘅麻勁同辣度，再加入鹹甜有致嘅秘製醬汁，應該刺激得嚟亦可以接受得到。醬汁稠身，每件雞件都吸滿辣醬，好惹味，而且肉質嫩滑，記住要食晒先好轉打邊爐啊。

老檀酸菜魚

雞煲以外嘅另一個選擇係老檀酸菜魚，無論香氣定味道都有濃郁嘅酸香，加埋花椒提味，麻香十足，辣度可自選。魚肉細滑鮮甜，最緊要係冇骨，索埋湯汁啖啖肉好開胃。

牛肉拼盤

打邊爐必食靚牛，呢個牛肉拼盤叫得過呀，精選嘅都係美國牛肉，而且有唔少都係達Prime級𠻹。拼盤包括有牛小排、安格斯、牛下肩、牛板腱、金錢展、雪花肥牛、封門柳，同埋坊間少見嘅牛胸爽、外裙柳等，牛胸爽係爽脆之選，鍾意油香多啲嘅可留意安格斯、封門柳、牛下肩等。

時令海鮮拼盤

海鮮控就梗係最關心海鮮拼盤啦，呢度嘅海鮮保證新鮮，店主每日都會親身落巿場採購㗎，所以食到嘅海鮮都未必日日一樣，但無論係大連鮮鮑魚、日本扇貝定係鮮帶子等，都係充滿鮮味，鮑魚大隻彈，帶子鮮甜爽口。

自助甜品

無論食到幾飽都好，總有第二個胃預留畀甜品嘅，仲要呢度嘅甜品區好有誠意，可以自由選擇同搭配，新鮮生果、豆腐花、芋圓、仙草等通通都有，砌砌下可以砌到成碗好似係甜品舖食嘅芋圓仙草豆花一樣，有料。

九龍城同撈同煲 （銅鑼灣）　　

早喺九龍城已儲滿人氣嘅港式火鍋店，喺銅鑼灣新開嘅分店一樣大走懷舊風，以六、七十年代嘅舊香港為主題，入到去見番晒舊地磚、海報、霓虹燈等，仲會播返當年流行嘅廣東歌，絕對可以嚟返晚懷舊之夜。食物方面當然以火鍋為主打，另有刺身、點心、甜品等供應。

老港沙嗲鍋

呢度嘅湯底有近10款，全部都係自家熬煮，例如有傳統嘅芫荽皮蛋魚頭湯，亦有創新嘅鹹蛋芥菜湯等，要特別推介嘅係老港沙嗲鍋。由餐廳秘製嘅馬來沙嗲，加埋京葱、椰漿、老雞、金華火腿同新鮮赤肉等，每日新鮮熬製18個鐘而成，湯底濃郁稠身，鹹中帶甜，帶有陣陣花生香，仲可以食到花生粒𠻹，係重味之選。

shake shake 炸魚皮及雞軟骨

餐廳唔係一味得懷舊，同時都好貼近潮流，有創新嘅 shake shake 炸魚皮同雞軟骨。6款shake shake粉口味包括蜜糖、bbq、芥末、孜然、麻辣同番茄，只要將shake shake粉連同炸魚皮/雞軟骨倒入專用紙袋，chok chok chok幾下就食得啦~ 嗜甜嘅朋友仔可以考慮番茄或蜜糖味，麻辣就唔算好辣但幾香口，最重口味一定係孜然，總有一款啱心水。

極級盛牛大拼盤

牛魔王必揀，一set有6個唔同嘅部位，包括封門柳、雪花牛粒、特級手切肥牛、特級安格斯、牛脷同飛驒和牛，要柔軟有柔軟，要嚼口有嚼口，要肉香有肉香，咁先夠滿足嘛。

大富豪刺身拼盤

有牛就梗係要有埋海鮮。呢個大拼盤份量十足，有海膽、帶子、象拔蚌、蝦、多款刺身等，仲有時令活魚，6個人都夠食。上枱時更可有仙氣煙霧效果，打卡一流。如果冇咁多人，怕食唔晒嘅，都有個細碼版嘅富豪刺身拼盤選擇。

懷舊糖不甩

呢個甜品必須要介紹下，完全顛覆咗大家對甜品嘅想像。鯉魚造型嘅糖不甩，係即場用湯底煮熟，再沾上花生糖碎食。即係話，你食緊嘅係咩湯底，你嘅糖不甩就會係咩味。如果你叫嘅係麻辣或沙嗲湯底，應該會感覺嘅新奇刺激。糖不甩口感煙韌，而且唔太吸油，可以一戰。另外個啫喱杯，仲要插埋把遮仔，完全係童年回憶呀！

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異