兩個人「撐枱腳」諗食咩菜嘅時候，如果怕少見嘅特色外國菜食唔慣，其實東南亞除咗香港人食開嘅泰國菜同台灣菜之外，馬來西亞菜同新加坡菜都係好選擇。去到以下餐廳，唔單止唔洗飛一轉，而且唔洗夏日炎炎坐喺無冷氣嘅熟食中心就食到正宗肉骨茶同喇沙等美食！
西環唔離地馬拉菜 馬來一菜館
位於西環區又有米芝蓮推介嘅酒店餐廳，擔心定價偏高？但睇返Set Lunch都係$148加一，其實又未到離地。招牌之一檳城炒貴刁即係炒粿條，有啲似廣式嘅炒河粉，不過配料調味就變成芽菜、雞蛋同黑醬油等。呢間嘅勝在鑊氣夠又香口。另外佢地嘅喇沙同海南雞飯都係招牌嚟，鐘意榴槤嘅朋友仔記得試埋佢地啲特色榴槤甜品！
大坑出色肉骨茶 肉骨皇
圖：阿打
餐廳叫得自己做「皇」，當然係有返咁上下水準，招牌檳城香濃肉骨茶嘅湯頭睇落幾深色，聞落亦足藥材香，不過飲落藥材味道唔會過濃，容易入口。而且豬肉排煮得非常腍，易咬開，而且既保留到肉味又有藥材甜味。配埋米粉同油炸鬼食啱哂，唔夠湯嘅話仲可以請店員免費添！另外海南雞飯同宜保咖啡骨都係推介。
鰂魚涌香濃海鮮喇沙 隨心
呢間小店主打新加坡菜，所以招牌海鮮喇沙亦係新加坡式嘅喇沙，蝦膏同辣椒香味比較重。而且比馬來西亞式嘅無咁重椰奶味，所以夏天食都唔會太膩，但香、辣、鮮味都有。值得加分嘅係配料夠多：蛋、帆立貝、魚片、蟹棒、鮮蝦同豆卜。仲有麥皮蝦、班蘭葉炸雞、沙嗲串燒等方便開心Share嘅嘢食。
更多【二人前指南】： |
灣仔車胎人推介馬拉菜 莎巴馬來西亞餐廳
至今連續三年（2015-2017）得到米芝蓮車胎人推介，呢間以正宗馬來西亞菜做招徠嘅餐廳自然唔可以睇小。精選菜式包括惹味又香噴噴嘅沙嗲串燒，同有濃烈香料味道又夠入味嘅巴東牛肉。另外推介油鬆餅，香口鬆軟，無論點巴東牛肉定咖喱都一樣咁夾。仲有小店秘方炮製嘅炸香蕉都係必食推介！
新派馬來西亞餐廳 PappaRich Malaysian Delights
呢間嚟自馬來西亞嘅連鎖店喺香港有中環旗艦店同銅鑼灣分店，裝修一樣舒適好坐。餐廳糅合馬來西亞嘅娘惹、印度菜同中菜風格，所以Menu選擇亦相當多。例如有最啱相機食先嘅紙巾飛餅，香氣誘人嘅蝦麵，重口味嘅咖喱雞配椰漿飯等，就連黃金飯都有唔同配菜任揀。值得一提佢地嘅飲品同甜品都各有特色，好似三色拉茶同榴槤芝士蛋糕。
新加坡連鎖Cafe 吉利尼
正如我地專欄作家小不啦嘰1大口分享嘅一樣，呢間嚟自新加坡嘅連鎖餐廳比較低調，但無阻Fans捧場嘅。Tea Time想一邊吹水一邊食少少嘢嘅話，咖椰多士就啱哂，烘到金黃香脆嘅多士夾住香甜咖椰醬同邪惡牛油，分量唔大但食完夠滿足。記得飲埋杯美祿恐龍，冰凍香濃，而且杯上面仲有滿滿嘅美祿粉，飲得幾慢都唔怕溝淡！
文：Cathy