九龍區又多一間咖啡店！新店走台日風格，以純白同木為主調，主打精品咖啡同手工甜點。咖啡從台灣各區烘焙再直送到港，有唔同風味選擇；甜點就係香港每日新鮮人手製作，少甜配方啱晒香港人口味又更啱配咖啡。當中亦糅合台灣特色，例如用台灣老店冬瓜茶調配嘅冬瓜茶拿鐵！
 

鳥山。商號由幾位旅遊Blogger開設，店名當中「鳥山」即係「島」以代表寶島，而商號係指呢度唔單止得咖啡，更糅合藝文、選物、旅遊等概念，係一間充滿台灣風格複合式Cafe！其中一位店主曾經旅居台灣研究咖啡，希望喺香港都可以開一間咖啡店，唔係一般Grab & Go，而係好似台灣咁可以有更多互動同交流，畀大家一個休閒舒適嘅空間。
 

一加一（$55）

咖啡由厚啉。咖勹一主理，採訪當日嘅House Blend係從高雄烘焙、埃塞俄比亞日曬同水洗豆嘅拼配，中淺烘焙帶出咖啡風味層次。一加一係指Espresso同Piccolo，建議先飲Espresso，酸甜平衡；Piccolo嘅花香同甜感更為突出，帶Nutty風味。
 

手沖咖啡（$70起）

手沖咖啡用嘅單品豆可以選擇厚啉。咖勹一從台北、高雄、宜蘭嘅烘焙咖啡豆，亦有本地烘焙嘅Guset Bean。拍攝呢款係高雄程式咖啡幫佢哋烘焙嘅埃塞俄比亞日曬咖啡豆，前段花香同甜味突出，中段乾淨酸甜似藍莓汁，後韻香甜帶提子風味，層次分明。
 

冬瓜茶拿鐵（價錢待定）

即將推出嘅冬瓜茶拿鐵最有台灣特色，冬瓜茶選用高雄老店天池傳統古法製作，以原片冬瓜炒12鐘頭嘅黑糖冬瓜煮成，無添加任何化學香料或防腐劑。用可愛嘅玻璃樽裝住，入口先有黑糖香同冬瓜嘅清甜感，之後係奶啡嘅香醇，口感柔滑而整體感覺清爽，甜而不膩。
 

 

台式芋泥卷（$45）

手工甜點就由月食·甜點研究所主理，每日新鮮製作而且係低糖配方，希望突顯食材原味，而且更適合配咖啡享用。台式芋泥卷選用台灣著名大甲芋頭製作，剩係整手工芋泥就要整三個鐘！綿滑嘅芋泥當中特別保留一部分芋頭原粒增加口感層次，微甜富芋頭天然香氣。配搭濕潤鬆軟帶蛋香嘅蛋糕，同香甜富奶味嘅忌廉一齊食，無論味道同口感層次都好豐富。
 

黑芝麻戚風蛋糕（季節限定，$55）

選用屏東金弘麻油花生行無糖無添加嘅古法柴燒純黑芝麻醬製作，外層嘅忌廉更咬得到黑芝麻顆粒，裡面嘅戚風蛋糕口感鬆軟回彈，黑芝麻香越食越明顯。加上自家製嘅芝麻脆脆，增添香脆口感。提提大家，因為甜點係人手製作，數量有限，想試齊咁多款建議早少少去呀。
 

店主選物包括新竹地方誌《貢丸湯》，香港上善若陶手工陶器，厚啉。咖勹一咖啡掛耳包禮盒等
 

鳥山。商號
地址：紅磡蕪湖街111號蕪湖居地下C2號舖

文、相：Cathy