要數具本地代表性嘅飲食文化，茶餐廳絕對榜上有名，皆因食物種類同價錢都相當貼地。但有店主表示，舊時嘅嘢食冇咁複雜，大家主要食餐蛋麵、腿蛋麵，只係隨住時代變遷多咗好多種類，有啲店舖更推出變奏版，吸引年輕一代，唔知呢幾間茶記嘅名物又會唔會令你想試呢？
西多+滷水雞翼尖 榮華冰室
圖：去茶記要去到茶果嶺？皆因呢間由六十年代開業至今嘅小店，裝潢幾乎冇變，仍然好似兒時嘅鄰里舖頭咁，極具懷舊感覺，仲有電影嚟取景𠻹，所以嚟呢度嘅朋友都係想食埋呢種風味。佢嘅招牌西多、雞翼尖係大部分人嘅選擇，前者即叫即炸，後者滷得相當入味。不過新年後有網民表示摸門釘，其實老闆因身體勞損所以要休息，希望佢早日康復，大家可以再嚟啦～
新派滑蛋菠蘿油 順興茶餐廳
由陳氏兄弟打理嘅大坑人龍店，佢哋表示爸爸喺大排檔開業約30年，主要賣車仔麵，近10年先搬入本店，新派菠蘿包同滑蛋飯反而係後加嘅「新品」。所有食物製作唔會假手於人，就連滑蛋飯豉油、車仔麵豉油都係自家製。呢度嘅招牌滑蛋菠蘿油，夾住厚身又juicy嘅滑蛋，減輕油膩感又更飽肚，但留意菠蘿包多數11:00am賣晒，想食要早啲嚟。而滑蛋叉燒/三寶飯淋上每日鮮製嘅豉油，甜中帶鹹恰到好處，而家店內仲有埋車仔麵食㗎。
懷舊滾水蛋 豪華咖啡茶廳
灣仔一間逾60年歷史嘅咖啡茶廳由排檔做到入舖，招牌仲係由右至左咁讀店名，未入去已經有種時光倒流嘅感覺。嚟到必試愈來愈少見嘅滾水蛋，飲之前趁熱戳穿蛋黃、快速攪勻。滾水蛋落2茶匙糖，口感較薄身帶淡淡蛋香。如果你係「小朋友口味」，奶水蛋就係牛奶加煉奶，蛋味相對淡少少，但較厚身順滑。另外最多人食嘅油央包，真身其實係多士，老闆推介配麥包，即係提子包，加上香甜咖央醬同厚切牛油，好有滿足感。
雞批+沙翁 華輝餐廳
圖：去茶記食雞批同湯翁？冇錯呀，呢兩款好似去麵包舖先買嚟食，但大家唔好忘記，舊時嘅茶餐廳基本都自己整埋包、蛋撻，甚至少量西式餅食。呢度嘅雞批有分大、細size；批皮有少少厚度，幾鬆脆；餡料注滿雞肉、洋蔥等，醬汁都唔少，食落唔會太乾。而整成球形嘅沙翁，口感比扁身嘅紮實，因為唔係空心㗎，外脆內軟有別於一般嘅沙翁。
文：Cathy
訪：Kate
相、片：Yan Yan
