Well，葵廣有新店，聽落好似old news咁已經無乜驚喜，我哋都係留意番今次新店有乜特別小食啦！新開呢4間小店全部開喺葵廣2樓潮流廊，等開飯仔逐間數你知先！

九龍城公和開分店　公和荳品廠

位於九龍城嘅公和荳品廠進駐葵廣開分店，負責人潘小姐表示，選擇喺葵廣開分店嘅原因除咗人流夠多，仲因為想方便一眾新界人。過往喺九龍城舖頭都聽到不少客人建議喺新界都開番間分店，所以今次選擇喺葵廣開店就滿足到呢班客人嘅需要喇！

店子供應招牌豆腐花，豆腐花仲會喺舖頭即撞即賣，新鮮滑溜。除咗傳統豆腐花，仲有特式豆腐花，可加入紅豆、朱古力、士多啤梨、雜果、淡奶、椰汁等心水配料。

另有招牌黑白豆漿添！

公和荳品廠
地址：葵芳葵富路7號葵涌廣場2樓潮流廊2期2023號舖

超澎湃流心雲石蛋糕　Miss Marble

開舖約1個月嘅Miss Marble，相信各位喺Facebook、Instagram都睇到不少佢哋即叫即製嘅甜品──雲石流心戚風蛋糕。外層嘅「雲石」其實係由熱融咗嘅棉花糖，再加入竹炭粉而成。當倒喺戚風蛋糕上面時候，半流動狀嘅棉花糖就會隨住「移動路徑」而形成不同紋路嘅雲石，視覺效果一流。

最多人買嘅，就係用TWININGS茶葉造成嘅伯爵茶口味蛋糕($48)，喺戚風蛋糕外層加入奶油忌廉，再淋上棉花糖竹炭粉就完成。甜品特別用低糖食譜，並且不加色素、防腐劑，食落比較健康。

連戚風蛋糕都有伯爵茶葉碎架，越食越有earl grey香。

宇治抹茶牛奶($48)，採用日本抹茶粉，食落以為好苦澀，但味道微甜不太苦，而且有淡淡嘅抹茶甘香，食晒一件都唔會覺得好甜膩。

比利時72%特濃朱古力($40)，將濃度72%嘅朱古力粒熱融，再加入全脂牛奶，令朱古力更香純，仲有少少朱古力焦香添！

由於製作呢個流心戚風蛋糕需時，所以每日只限量出爐50個，想食嘅客人要畀啲耐性啦！

食完蛋糕，不妨要多杯飲品清下喉嚨。舖頭飲品係由鍾舒漫嘅品牌Pistislife合作設計，當中最特別就係呢杯紫色梳打特飲！今次用嘅並非蝶豆花，而係最新養生食材──黑枸杞，有明目功效，而且普通加水就會形成好靚嘅紫色飲品。

將大約20粒黑枸杞、糖漿、檸檬、梳打水攪勻，就變成黑枸杞特飲($32)。黑枸杞本身無乜味道，所以飲落直頭係檸檬水嘅味道，好light！舖頭仲打算推出熱飲，飲完更暖、更養生！

下星期，舖頭將會推出冬季限定嘅雲石曲奇餅，有心形、有雪花，好靚，價錢為$33！

Miss Marble
地址：葵芳葵富路7號葵涌廣場2樓2015號舖

立食船河生菜包　泰風SO

同樣喺葵廣嘅泰風SO總店憑4色芒果糯米飯而好有人氣，今次喺2樓開分店則力推泰國船河，船河配料可揀牛丸、豬肉丸、魚蛋或者扎肉。

先將河粉、豬肉丸、豆卜等配料煮熟，然後加入南薑、金不換及湯底，最後加上蔥花、脆豬皮就完成。河粉可轉米線、金邊粉或者泰國MAMA麵。

湯底係用雞骨、豬骨及泰式香料熬咗一晚，所以湯色偏深。

船河只需$25，大大碗好抵食。味道方面，湯底好甜好濃郁，河粉亦都幾掛湯，而泰式豬肉丸雖然細粒咗啲，但好彈牙多汁。

另外，開飯仔都試咗個泰式生菜包，喺一眾葵廣小店之中居然有生菜包食，好有趣。

將豬肉碎、米碎、辣椒、泰式香料等拌勻，另加一籃生菜就搞掂。

唔夠食嘅話，可以$8追加生菜架！

豬肉碎有肥有瘦，口感有油香又有韌勁，而且味道辛而不辣，泰式香料好惹味。用生菜包住啲肉碎一齊食，好清爽。美中不足嘅係，如果有濕紙巾畀客人抹手就更方便喇！

泰風SO
地址：葵芳葵富路7號葵涌廣場2樓潮流廊2期2008號舖

獨食最滋味　自私麻辣雞煲

去呢間舖頭食嘢，絕對可以自！私！食！因為舖頭講到明「自私食」，主打自私食雞煲，一杯入面有鮮雞件、豬皮、蘿蔔、紫洋蔥、芫茜及麻辣汁，$35/杯，好抵食！

食完覺得好味嘅話，可以幫襯舖頭嘅原隻自私雞煲，可以拎番屋企食全隻雞！雞煲除咗雞件，仲有豬皮、蘿蔔、麻辣齋、紫洋蔥及芫茜，而且最遲1個鐘頭前預訂就搞掂，正！價錢為$168/半隻、$238/隻。

小店亦特別為素食人士炮製呢個自私食麻辣齋($20)，吸收麻辣汁味道，好有辣勁。

自私麻辣雞煲
地址：葵芳葵富路7號葵涌廣場潮流廊2期2樓2006號舖

文：Joy、部分圖片來源：Miss Marble、自私麻辣雞煲