近年多咗餐廳加入Go Green大軍，好似最近新開呢間位於西營盤嘅小小咖啡蛋糕店，供應一系列自家製蛋糕、全素茶點、多士等，配多杯House Blend咖啡就啱哂。店主希望各位素食朋友多個選擇之餘，平時無食開素嘅亦可以一試跑「素」！
 

Latte（$40）

JOMO Coffee & Cakes位於離港鐵香港大學站五分鐘路程嘅一條小巷裡面，由三位年輕人開設，主打各款素食糕點同咖啡。呢杯Latte就係請本地咖啡烘焙品牌Roastwork幫小店調配嘅House Blend咖啡豆，味道帶朱古力同榛子香，後韻係微微果香，配牛奶或豆奶都容易入口。
 

Apple Pie（$68）

小蛋糕櫃裡面每日都會有幾款Vegan茶點，重點推介呢款經過改良嘅全素蘋果批，翻熱後聞到濃郁肉桂香，食起嚟唔會太甜，因為有蘋果嘅微酸平衡返，批面落咗麥片增加香脆口感。食到一半可以連埋自家製香濃椰子忌廉同焦糖醬一齊食，增加味道層次。值得一讃嘅係雖然係全素，批邊依然做到酥脆口感。
 

Houjicha Cheese Cake（$52）

蛋糕同樣係小店自家製，都係蛋奶素而且選用低糖配方，食完罪惡感都少啲。焙茶芝士蛋糕用咗日本小山圓焙茶粉，蛋糕食落茶香明顯，加上Creamy濃厚口感相信可以滿足一班焙茶控。上面嘅焙茶醬就奶香同茶韻平衡，帶茶葉烘焙香味。
 

Black Sesame Chiffon Cake（$52）

除咗西式同日式之外，其實蛋糕仲可以係中式風味！呢件戚風蛋糕就用咗台灣黑芝麻，嚟到香港先磨碎，盡量保留當中香味。蛋糕同忌廉上面以桂花同杞子點綴，三款都係養生食材。戚風蛋糕口感鬆軟而富彈性，忌廉仲食得出有少少芝麻嘅細碎口感。如果蛋糕嘅芝麻香可以再突出啲相信會更討好。
 

 

Toast Platter（$168+$20）

除咗甜品，呢度亦供應四款多士，麵包用咗談風：vs：再說製作嘅酸種麵包，兩間店好近，所以麵包可以盡量保持新鮮。如果你同開飯仔一樣有選擇恐懼就最啱搵多幾個朋友一齊分享呢個Toast Platter，可以揀三款口味。最有驚喜嘅係Parma Ham & Fig with Cotton Cheese Toast，雖然要加$20，但糅合咗無花果嘅甜香、Parma Ham嘅鹹味，最後有Cotton Cheese嘅淡淡奶香，味道豐富。

而Smoked Salmon with Cream Cheese Toast就以煙燻三文魚香為主，亮點在於上面嘅醋漬洋蔥，帶走洋蔥嘅部分辛辣而保留Juicy口感同甜香，中和三文魚嘅油脂膩度。Avocado & Mushroom Toast係全素口味，菇菌香濃郁，牛油果香味就有啲被蓋過，不過柔滑口感依然吸引。酸種麵包烘過後做到皮煙韌而裡面帶彈性，亦係一大加分位。
 

唔單止多士嘅食材經過用心搭配，呢份Toast Platter亦附上沙律、燒菠蘿同水波蛋，沙律有杏仁、提子乾增加味道，燒菠蘿非常多汁最啱解膩，水波蛋蛋黃夠流心，可以配牛油果多士一齊食。
 

食材上嘅心思仲包括茶飲選用泰國手工調配茶品牌TE嘅茶葉，有唔同配搭之餘部分仲加入唔同泰國特色香料，各自有唔同功效。而蛋糕除咗可以堂食切件外，亦可以買原個6或8寸蛋糕，不過就記得要提早3日去小店，或者Inbox佢地Facebook Page訂購啦。
 

JOMO Coffee & Cakes
地址：西環西營盤水街4號地下D號舖

文、相、片：Cathy