一連五日嘅青衣戲棚正式開鑼！開飯仔喺首日就走去直擊兼搵食，全場有成80幾檔小食，全部喺你面前即製，檔檔都好吸引！但人只得一把口一個胃，點揀呀？唔緊要，因為時間關係，開飯仔已經幫你睇定有咩好食、邊檔最人氣，去掃街梗係要做足準備啦！

今年人龍最長嘅美食檔都係台式食品，目測最多人排一定係台式手工芋圓檔，因為夠大杯抵食，可以揀仙草或者西米底，珍珠、芋圓都好足料，仲有一大球紫薯蓉，抵排嘅！

台式手工芋圓 $35

另一個長期人頭湧湧嘅檔口，就係首次出現嘅蚵仔煎！蚵仔夠大粒，而且味道似足台灣，口感仲冇咁流質，係好味嘅！

蚵仔煎 $30

邪惡芝士大啡菇都好受歡迎，有黑松露煙鴨胸芝士、芝士煙肉同芝士流心蛋三款口味可以揀，最多人點黑松露，菌香好濃郁，但芝士可以再多啲。

黑松露煙鴨胸芝士焗啡菇 $40

梳乎里班戟都好多人排隊，口感軟綿綿，不過質素唔太穩定，好似我買咗一份燶底嘅，檔主都肯換返另一份俾我。

梳乎里班戟 $45

雞翼包飯唔係新款，不過係個人推介。無骨雞翼醃得入味又啖啖肉，糯米飯都好足料，不過食完都幾滯吓，差啲打爆個胃食唔落其他嘢…

雞翼包飯 $30

海鮮檔不嬲都係戲棚常客，連殼帶子同鮑魚蒜香十足，而且食落熱辣辣。其他海鮮仲有白酒煮蜆、焗蟹蓋同燒金蠔等等。

燒日本鱈場蟹蓋 $45、蒜香帶子 $25、串燒鮑魚 $45

飲品最得意就係星空奶樽，可以揀兩款唔同果味糖漿，再溝七喜同蝶豆花飲品。飲之前檔主會放入乾冰製造噴煙效果，等冰揮發晒就飲得，味道比想像之中少甜喎！

星空奶樽飲品 $30

本來想玩流水麵，不過當日仍然未準備好。

火焰芝士黑松露瘋脆黃金薯條 $30

台式手抓餅 $30

極盛玉子燒 $50

青衣戲棚由即日做到12/4咋，日頭人流較少，早少少來由朝掃到晚啦！

青衣戲棚

地址：青衣青綠街球場

舉行日期：2017年4月8日至12日

時間：2:30pm-12:00mn

文、相：Perrins