呢個週末，我地先去巴西食街頭小食，再去越南食越式三文治，墨西哥食新派小食，再返嚟香港食用可持續發展魚類整嘅魚蛋......雖然親身飛去就難啲，但如果開飯仔同你講去鰂魚涌就可以試勻哂咁多款環球特色美食又點睇？
 

4月22至23，同29至30號連續兩個週末舉辦嘅糖廠街市集，再次同本地社企Honestly Green合作。主題為「本地食材、全球煮意」，所有餐廳售賣嘅小食都用咗本地食材！而且參加嘅大家亦可以為環保出一份力，自己帶環保袋同可循環再用餐具去，減少製造垃圾！
 

今次市集有超過40個特色攤檔，包括將正宗巴西街頭小吃Coxinha（炸雞肉包）同芝士球帶到香港嘅Kitut’s Brazil，賣正宗獨特泰國小食嘅Fat Legs' BBQ，同以清新獨特口味為主嘅人氣日式餐廳Okra。
 

另外仲有炮製新加坡特色Mee Pok（面薄）嘅The Meepok Club、人氣烘焙甜品店Sugar Daddy & Son's、墨西哥Fusion餐廳CHINO，同賣地道越式三文治嘅Co Thanh等攤檔。
 

香港本土代表方面就有超過50年歷史而且選用可持續發展魚類整魚蛋嘅許記魚旦，同新登場兼帶嚟手工啤酒雪條嘅本店啤酒品牌Heroes Beer Co等。
 

另外市集亦集合咗178 Degrees，Stracco by PHK Asia Ltd，Canarice，LEVAIN，Greek Deli等包裝食品供應商。市集免費入場，週末又多個好去處啦。

info
糖廠街市集
活動日期：2017年4月22、23日、29及30日
開放時間：上午11時至下午5時
地址：鰂魚涌太古坊糖廠街

文：Cathy
相：Kar
片：Perrins