夏日炎炎食返軟雪糕當然好，如果食嘅係用25%日本北海道鮮忌廉加埋酥脆曲奇筒嘅CREMIA軟雪糕，更加好！唔係開飯仔妙想天開，而係日本CREMIA軟雪糕真係即將登陸香港！一齊解構下到底呢款軟雪糕有幾大「味」力啦。
 

秋櫻屋今次同日本Nissei合作，將近年喺日本大熱嘅CREMIA軟雪糕引入香港，呢個星期四(15/6)早上11:30開賣！每日限量約400杯，暫時只提供外賣。
 

唔單止雪糕機唧嘴需要特別訂造，以唧出特別直紋，而雪糕同langue de chat曲奇筒亦分別喺日本北海道同大阪直送到港，保證大家食得到嘅味道同喺日本食嘅一樣。
 

呢杯雪糕喺日本之所以咁受歡迎，原因之一就係用咗25%北海道產優質鮮忌廉，同牛乳脂肪高達12.5%嘅鮮牛奶，所以牛奶味道相當濃郁。唔習慣嘅人會覺得有陣牛奶羶味，但鐘意嘅人就會覺得特別香醇。
 

另一方面係軟雪糕嘅空氣含量只有30%，比起一般嘅40-60%嚟得低，口感更Creamy更入口即溶。不過咁同時亦代表雪糕好容易溶，天氣熱嘅時候唔好俾相機食咁耐喇。雖然暫時只有外賣，但餐廳亦表示稍後會考慮加入堂食Menu配Pancake一齊食。反應好嘅話，甚至會考慮喺香港更多唔同地方售賣！

文、相、片：Cathy