香港土地問題嚴重，特別係金鐘、中環一帶呢啲核心地段，周圍都係人，有時放lunch、放工想喺附近搵嘢食醫下肚，都唔容易，啲餐廳唔係冇位就係太貴。其實唔使下下都係得個等字嘅，外賣同野餐都係個唔錯嘅選擇，咁啱金鐘嗰頭都有大大片綠油油嘅草地好啱野餐，仲可以呼吸下自由嘅空氣。今次就幫大家整理港鐵金鐘站同太古廣場附近，合共六間最啱Grab & Go嘅餐廳，想去野餐或者喺附近「扮工」嘅朋友仔可以參考下。
港鐵金鐘站
即買即食輕怡快餐 Pret A Manger
嚟自英國嘅三文治及咖啡店，有三文治、沙律卷、沙律、乳酪杯等等，拎去野餐真係夠方便。而且部分係全素，亦有選用可持續海鮮嘅食物，環保係為自己為地球出一分力吖嘛。
日式飯糰、小食 華御結
相信大家都好熟悉呢間主打日式三角飯糰嘅舖頭，特別包裝一撕一拉之後，真係一手玩電話一手食都得。不過溫馨提示夏天天氣炎熱，去野餐嘅朋友就唔好買太多飯糰，可以改買其他唔需要冷藏嘅日本小食甜品。
冰凍健康涼茶 健康工房
出到街先諗起唔記得帶雪定咗嘅冰水？唔緊要，除咗去便利店之外，去呢間涼茶鋪一樣有唔少雪凍晒嘅涼茶同滋潤飲品買。飲完唔夠喉仲可以食埋魚蛋燒賣啫。
包裝零食任揀 Marks & Spencer 食品專門店
同樣嚟自英國，同樣有三文治等輕食，呢間專門店嘅包裝食物會比較多，最啱就係買一大堆，野餐識朋友嘅時候就可以開心Share，好似曲奇、軟糖等可以補充血糖，薯片、爆谷等又夠易分。
太古廣場
大大份漢堡打氣 Triple O's by White Spot
漢堡包快餐店選擇都唔少，好似呢間從金鐘站行過去都幾近，漢堡包Size大而且又足料。仲有Impossible Burger揀，食完一大份都無罪惡感。而且開到夜晚10點，食個Late Dinner都得。
東南亞風味捲餅 HAWKR
唔想下下都食西式三文治同麵包，呢度就有比較東南亞風味嘅捲餅(Wraps)畀大家揀，另外亦有三文治、飯、麵、奇亞籽杯等等，有凍有熱而且已經包裝好，即拎即買就可以即食。
去野餐前除咗記得準備充足食物，亦要記得帶以下物品：
1. 水/運動飲品
記得補充足夠水分，自己帶或者買定都得，亦可以利用一啲手機apps睇睇附近有咩飲水機/補水站
2. 扇、雨具
夏天天氣熱又容易落雨，唔想病親記得帶定遮
3. 行動電源
添馬公園最近成為野餐熱點會比較多人，要同朋友保持聯絡手機要叉足電，再帶「尿袋」就萬無一失
4. 口罩
夏天唔少人可能都有「冷氣感冒」，為咗預防都係帶定口罩安全啲
最後注意返去野餐最好著返舒適鬆身衣物，最後就係淺色減低被蚊叮嘅機會，怕曬可以戴埋帽同太陽眼鏡。仲有自己垃圾自己執，愛護香港人人有責啊！