又一間嚟自台灣嘅茶飲新店，近排差唔多每星期都有一間新舖開，呢股熱潮睇嚟都仲會持續一段時間。講返呢間，佢哋雖然都有珍珠，但主打其實係現泡茶飲同埋手作鮮果飲呀，去到嘅話可以試下叫啲珍珠奶茶以外嘅茶飲試下。

茶底嘅選擇主要有東方美人茶、金萱、烏龍等等，茶葉全部都嚟自台灣，如果鍾意飲茶嘅朋友，揀返杯手沖現泡茶葉啦，咩都冇添加落去，咁先飲到最原始最清純嘅茶味。仲要全部都係即叫即沖，沖泡幾次。第一泡茶倒走唔要，第二、三泡茶嘅茶味慢慢滲出，就沖泡成一杯甘香嘅現泡茶啦。

夏天想要飲啲清爽嘢，木衛手作鮮果飲同仲夏接骨木都係唔錯嘅選擇。前者會按季節同時令使用唔同嘅本地鮮果，而呢期嘅就係西瓜同鳳梨。將生果切粒後再製漿，加入西瓜汁同自家製有汽水，成杯感覺爽口得嚟又有啲果甜，仲有粒粒果肉食到添~ 至於後者，係沙冰嚟，綠茶底再加接骨木、檸檬、薄荷，淨係就咁聽個配搭都已經可以想像到有幾清新。飲落酸咪咪咁，好fresh，夏天熱辣辣飲飲就啱晒，好解渴。

但講到驚喜，就應該係呢杯奶霜法芙娜喇。Menu上嘅description講到又朱古力又oreo，出嚟又真係見到成杯朱古力色，面頭仲要有咁多oreo碎，心諗實好甜啦。吖又唔係喎，飲落去朱古力味係幾香濃，但又唔會太甜，反而仲有陣甘甘地澀澀地嘅味，係藍伯爵茶嘅作用呀！茶嘅甘香中和返朱古力嘅甜，估佢唔到，好好飲。茶不可貌相呀。

木衛二
地址：銅鑼灣怡和街22號地下3號舖

文、相：Kar