銅鑼灣呢間超級市場嘅Food Court最近重開，主打「Buy & Dine」概念，喺Food Court食到嘅嘢去超市就買到相關食材！而且有成13個專區，各有唔同特色：各地新鮮海鮮、時令生蠔、自家熟成牛肉、Mix & Match營養沙律、即席烹調麵食等等，非常多元化。 
 

Amazing Food Hall位於時代廣場B1地庫，全新Buy & Dine同Dine & Wine概念，即係喺Food Hall享受完美食之後，仲可以去city’super 買返相關食材，返屋企自己煮！Food Hall有超過150個座位，共有13個專區，開飯仔就幫大家精選當中七個專區逐一介紹。
 

Oyster Bar 生蠔吧

漁人海鮮生蠔拼盤（$588）

用鳥籠裝住非常豐盛嘅拼盤，當中會有當季新鮮生蠔，例如最近就有澳洲高紛灣蠔、city’super 法國特選生蠔等。以及加拿大熟龍蝦、翡翠螺、泰國熟原隻白對蝦、釀麵包蟹蓋、熟雪花蟹鉗，多重享受。
 

法國city’super 特選生蠔Nr.0（$48/隻）

獨家發售嘅生蠔品種，特點係喺著名營養充足嘅Mont-Saint-Michel海灣養殖3年，肉質鮮嫩肥美。而Nr.0即係最重嘅等級，蠔肉夠大食得夠滿足！
 

澳洲手指青檸（買任何8隻生蠔免費贈送）

想食到生蠔原原本本嘅鮮味，最簡單就係加少少檸檬汁就咁食，而呢度特別引入澳洲手指青檸，果肉一粒粒好似魚子醬咁，一咬就會爆開，清新多汁好過癮。
 

Sushi & Sashimi 壽司及刺身專區

海膽刺身海鮮丼（$388）

原板海膽奉上，視覺效果已經先加分！選用北海道小川商店海膽，佢哋會搜羅時令品種，確保一年四季都供應到最優質嘅海膽，而且秉承可持續發展嘅使命。
 

海幸大漁壽司定食（$298）

集合各款時令刺身！例如拍攝呢日就有北海道帶子、挪威極光三文魚、愛媛縣鰤魚、北海道甘蝦、鳥取八爪魚、福岡魷魚、美國加州海膽等，建議大家可以按味道淡到濃嘅順序享用。
 

Seafood Kitchen 海鮮吧

澳洲Skull Island 野生虎蝦（$78/100g）

海鮮吧每日從世界各地空運當季海鮮到港，虎蝦肉質爽脆，簡單燒過已經非常香口。而現場除咗燒烤之外，仲可以要求以蒸、煮、烤焗或者加麵包糠油炸唔同方式烹調。
 

西京燒紐西蘭野生橙魚定食（$88）

紐西蘭橙魚味道較清淡而且肉質結實，所以用西京燒方式處理最適合不過。以白味噌帶出魚肉鮮味，燒過後增加一陣甘香，配白飯食一流。
 

白酒煮時令活青口（$68）

選用澳洲有機活藍青口，肉質結實飽滿，配以白酒汁鮮甜味突出。
 

 
Butcher Factory 肉類專區

東‧西‧薈 炕燒牛肉拼盤（$628）

自認嘴刁嘅食肉獸必試！一碟可以試到四款唔同優質牛肉：city'super自家製60日乾藏熟成英國Lincoln Red純草飼肉眼、美國長期穀飼安格斯西冷牛扒、獨家引入嘅1++橫城韓牛西冷，同日本山形A5級和牛西冷。按呢個次序食就係按肉質由結實到軟腍，亦可以調轉次序從肉味淡到濃咁享用。
 

炕燒美國長期穀飼安格斯斧頭牛扒（$1428）

斧頭扒燒烤前達1.5kg，而且每隻牛都唔會切得出超過10塊斧頭扒，完全就係超級重量級！呢度採用嘅係純種安格斯牛，指定以天然飼料餵飼唔少於350日，矜貴得有原因嘅。
 

日本山形A5級和牛壽喜燒定食（$148）

壽喜燒可以另揀如日本名古屋地雞、英國Daylesford 有機豬腩肉、法國西南部產鴨胸等，但帶甜嘅壽喜燒醬汁，始終都係同入口即溶嘅和牛最夾嘅。連白飯都好講究，玄米以精米技術保留營業，煮出嚟亦粒粒分明有飯香。
 

炙燒日本山形A5級和牛壽司（$98/3件）

另一種享受和牛嘅食法，用火槍逼出和牛油香，亦可以保留牛肉柔嫩嘅口感。
 

Super Green

博多屋豆腐野菜配日式芝麻醬（$82）

藜麥莎莎配蕃茄莎莎醬（$88）

知道大家開始多咗Go Green，呢度亦特別推出可以自由配搭超過60款新鮮配料嘅Super Green Bowl，唔單止有嚟自世界各地嘅新鮮蔬菜水果，亦有暖胃配菜，增加唔同選擇。有選擇恐懼嘅朋友亦可以揀預設嘅六款Super Green Bowl，每款都有15至20款唔同食材，營業均衡。
 

Noodles & Pasta 麵食專區

日本豚角煮豬骨湯拉麵（$128）

生麵、意粉、烏冬、拉麵等一應俱全，可以按自己口味配搭唔同麵同湯，好似呢碗就以北海道西山製麵嘅拉麵配搭豬骨湯，拉麵有咬口而掛湯。而豚角亦分量十足。
 

洋蔥湯（$48，8-10月限定）

選用意大利Giarratana嘅珍寶洋蔥，唔單止體積夠大，而且味道香甜，口感亦比較Meaty。因為洋蔥收成期係每年嘅7至9月，所以係季節限定。
 

Wine Town 醇酒窖

（右）Champagne Philippe Gonet Roy Soleil Grand Cru Blanc de Blancs Brut NV（$498/支）

將超級市場嘅酒區搬咗過嚟，大家就可以用零售價享用美酒配佳餚！酒嘅選擇由紅、白酒、日本清酒、有氣酒等超過1500款選擇。例如呢支香檳就最啱配生蠔，帶花嘅香氣，有蘋果、檸檬片嘅味道，加上氣泡更可以突顯生蠔鮮味。
 

Amazing Food Hall
地址：銅鑼灣勿地臣街1號時代廣場B1樓

文、相：Cathy