鍾意食蠔嘅朋友注意喇！銅鑼灣最近新開一間以日本牡蠣為主題嘅日本餐廳，唔少菜式都以牡蠣入饌，都幾有創意～餐廳由日本人開設及主理，每道菜式都選用日本新鮮食材，除咗蠔之外，亦有供應刺身，丼飯及日式料理，絕對滿足到你想返鄉下嘅慾望！
鐵盒燒生蠔（$380）
首先會將原隻蠔連殼放入鐵盒中，然後倒入清酒，燒九分鐘後就食得喇！特意選用兵庫或廣島蠔，細細隻但味道上會比較鮮甜，而且即場燒熟更能感受到蠔嘅鮮味。
牡蠔忌廉意粉（$118）
蠔意粉你又食過未？蠔肉先用橄欖油及醬油等煮入味，而忌廉菠菜汁喺烹調過程中都加入咗蠔汁，令整體蠔味更突出，而且忌廉汁同蠔汁呢個配搭真係好有新鮮感～
牡蠣飯糰（$58）
飯糰包裹住原隻牡蠣，外層香脆，帶有陣陣炭燒香氣及蠔香。
生蠔
選用日本直送岩手縣生蠔，大大隻，彈牙鮮甜。而且上面加咗海膽、三文魚籽及魚子醬，再添一份海鮮嘅鮮甜及鹹香，好有層次。
特上刺身拼盤（$440）
食日本菜又點少得刺身，特上刺身拼盤必定有北海道海膽、北海道帆立貝、大拖羅及牡丹蝦，再搭配幾款時令刺身，全部都由日本直送。
Kagura彩虹魚生飯（$198）
呢味彩虹魚生飯啱晒相機食先，將所有刺身先放入瓶中，之後再鋪上白飯，刺身包括帆立貝、蠔、螢光魷魚、山芋蓉、吞拿魚、左口魚及蟹籽等，吸睛又好食。
味醂鯖魚一夜干
同坊間唔同嘅係用味醂浸鯖魚，因為鯖魚本身係一隻偏向濃味嘅魚，所以用味醂整會更突出鮮味。
地址: 銅鑼灣駱克道459-461號The L.Square10樓
文、相: Yanica