以日本為第二鄉下嘅香港人，呢幾個月都冇得回鄉，思鄉病頻頻發作？銅鑼灣有間新開嘅日本餐廳，主力做廚師發辦，拖羅、海膽等多款刺身由北海道、九州、福岡等地每日空運送到，Lunch有三款選擇，每款都會有沙律、茶碗蒸、壽司、濃湯烏冬同甜品。其中，中價嗰款就會有12件壽司。呢度嘅壽司全部採用赤醋米製作，而且飯量少，一口size就食得晒，啱啱好。不過壽司同刺身都會根據時令返貨，未必每次都係呢幾款呢~

12件壽司經過師傅精心設計，由淡到濃，逐件逐件咁上。首先登場嘅係鱆紅魚，撒上柚子胡椒令較清淡嘅魚味中帶有微辣，口感煙韌。深海池魚則加上柚子皮，魚味比上款濃郁少少，小清新。

厚肉嘅赤貝，師傅會拍一拍啲肉，使之收縮，然後就上枱。呢道要即食呢，咁先至食到最爽口嘅口感。輕輕燒過層皮嘅伊佐木，加入岩鹽、芽葱、姜汁、檸檬汁調味，又幾香口。

平時多時係熟食料理嘅北海道銀鱈魚，變咗做刺身壽司食材後，口感有別於平時，肉質鮮甜爽口，富油脂香。燒過嘅魚肉再放上三升漬，魚油特香。中拖羅則肉質細緻。

12款壽司中，最吸引嘅一定係牡丹蝦，除咗大大隻賣相夠晒吸睛之外，師傅仲會刮晒啲蝦膏出嚟，再用火槍燒一燒，又香又爽，好滿足。

 鯖魚、醬油漬吞拿魚

北海道馬糞海膽亦係重點之一，好rich好甜身呢。

 三文魚子、大拖羅

至於晚巿時段，一個套餐則包括有前菜、刺身、壽司、和食料理、湯品同甜品。

嚟自三重縣嘅桃取生蠔，好清爽，亦有陣陣鹹香海水味，師傅更特意加入自製酸汁啫喱，食更清新。較少見嘅愛女魚肉質彈牙，建議可以捲埋芽蔥一齊食，增加口感。

蟹道樂係為前菜，非常豐富。蟹蓋內，混埋咗松葉蟹嘅蟹肉、蟹膏、海膽，仲有三文魚子，啖啖都有香濃嘅膏鮮味。

 鯛魚濃湯、柚子麵豉燒銀鱈魚配栗子蓉

而家新開業仲有優惠，二人同行第二位有半價！三人以上則有正價75折，除返開大約300零蚊就食到個Omakase lunch啦~晚巿都唔需要$1000！ (優惠期至2020年7月31日)

鮨三川
地址：銅鑼灣渣甸街50號渣甸中心6樓

文：Kar
相、片：Calvin Kwok