居酒屋唔係淨係日本嘅專利，韓國都可以有！最近就有間韓式居酒屋喺銅鑼灣開業，由韓國人擔任大廚，煮出韓風十足嘅菜式，最特別就係好似韓國文化咁，設有席前烹調嘅菜式。同時有多款韓國啤酒、燒酒等供應。餐廳設有室內外座位，適合Chill out。

 專人席前烹調

Menu主要分為刺身、小食、鹹食、燒物、飯類同湯品等等，當中必試嘅一定係有專人喺你面前烹調嘅House韓牛胸肉，夠晒氣勢又有睇頭。餐廳選用頂級1++韓牛前胸肉，拎埋個爐頭同大鑊出嚟喺客人面前燒香，再加入泡菜、芽菜等幾款配菜一齊燒，未食都已經聞到香氣。即燒即食嘅韓牛入口啖啖油花，口感軟滑。識食嘅一定加埋泡菜炒飯，不過份量有啲多，可能要至少4個人先至食得晒。如果得2個人撐枱腳仔嘅，就淨叫牛好了。

海膽牛肉他他賣相吸引，以紫菜包住紅米飯，頂層放上由澳洲和牛牛柳製成嘅生牛肉他他，加埋海膽同魚子醬，一啖入口係海膽嘅甘甜鮮香，原來仲有隱藏大絕，師傅喺入面加咗啲直接喺吞拿魚度提煉出嚟嘅魚露，增加鮮味。不過可能亦係因為海膽鮮甜味太突出，就搶晒牛肉他他嘅focus了。

食韓國嘢，泡菜必不能少。呢道熟成泡菜布拉塔，底層係熟成泡菜加炒豬肉片同番茄，面頭就係邪惡鉅子布拉格芝士，撈埋一齊食更可中和辣感。值得一提嘅係，餐廳嘅泡菜都係自家醃製，仔細食嘅話，會食得出唔同菜式中嘅泡菜嘅酸辣度同甜度都有分別。好似呢道嘅泡菜比起House韓牛胸肉就更有辣感了。原來係因為師傅特地按各菜式嘅味道而調配，每份泡菜嘅醃製時間長度都有別呢。

大大隻嘅紅竹蝦，每隻約長25-28cm，視覺效果先聲奪人。紅竹蝦開邊燒香，面頭舖滿番茄粒同洋蔥粒等，隻蝦仲要有機會有蝦膏！不過蝦肉略為淡味咗少少。

韓國嘢又唔一定味味都咁濃、咁重味嘅，想清清地嘅有雜菌飯。集靈芝菇、冬菇同黑松露片於一身，配埋較健康嘅紅米飯，清淡得嚟反而有種refreshing嘅感覺。

 馬蘇里拉芝士炸豬扒 配柚子蛋黃醬

 餐廳設室內外座位

교자상 GYOJASANG 
地址: 銅鑼灣加寧街1-3號Fashion Walk地下C號舖

文：Kar
相：Michael