銅鑼灣一向多日本餐廳，最近新開嘅竹日本料理更加係非常之矚目。先請來日本殿堂級建築大師隈研吾做室內設計，係全香港第二個大師級作品！顧問廚師同駐場總廚都係日本米芝蓮星級人馬，陣容強勁！

其實餐廳前身為位於Cubus嘅竹壽司，搬到地方更大嘅地舖，成個格局提升咗。老闆兼本地室內設計師梁志天(Steve Leung)、燈光大師關永權 (Tino Kwan)及日本著名建築師隈研吾合作設計，隈研吾以「負建築」聞名，作品包括福岡星巴克、東京歌舞伎座，以及為2020年奧運興建國立競技場。6,000呎餐廳以日式庭園為概念，以竹劃分成五個區域，充滿和風「侘寂」之美。

隈研吾（左）、梁志天（右）

五個區域為「離れ」、「庭」、「縁側」、「中庭」、「奥」，分別代表日式庭院唔同部分，以竹林屏風間隔，有空間感亦有層層疊視覺效果。

廚師同樣係星級人馬，顧問廚師石橋正和率領新加坡餐廳小康和，於2016年開業僅四個月就摘下米芝蓮二星，實力不容忽視。駐店主廚原榮作就曾於東京米芝蓮二星天婦羅專門店Tentenpura Uchitsu及一星銀座鮨一工作，而壽司師傅就係同樣出身自小康和及銀座鮨一嘅鈴木將宏。

石橋正和（左）、原榮作（右）

以前竹壽司主打壽司刺身，呢度菜式更多元化，必吃係主廚最擅長炮製天婦羅，選用時令日本食材，天婦羅漿有柯打先即製，選用日本芝麻油。廚師以純熟手勢沾粉、油炸，拿捏適當時間，炸漿厚薄度剛好，而且食材中心仲係燙熱而唔燶。炸蝦、公魚更可以炸至挺身！

公魚天婦羅（時價）

海鰻 $280/件

鐵板燒亦係呢度拿手好戲，除咗傳統製法，更有加入法式製法，如自製醬汁及唔同食材作配搭，如藏紅花醬伴帶子、脆煎甘鯛意大利飯等，口感味道更多變化層次。

鐵板燒近江牛A5和牛 $680

藏紅花醬伴北海道帶子 $230、珍寶西班牙紅蝦伴稻庭烏冬 $390

脆煎甘鯛意大利飯 $330

餐廳繼續供應強項廚師發辦，由石橋正和創作，菜式選用名貴時令食材好似北海道馬糞海膽、魚子醬、意大利黑松露及河豚白子等，或以多款食材mix and match，帶出不同味道及口感，好似蛋黃醬油拌牡丹蝦配魚子醬、河豚白子黑松露三文魚籽海膽飯等。其中來自九州鮑魚更煮足4個鐘，飯加入鮑魚肝醬，配上鮑魚清湯，鮮味極濃。

河豚白子黑松露三文魚籽海膽飯、海膽烏魚子鮑魚意大利飯

蛋黃醬油拌牡丹蝦配魚子醬

稻草炙燒吞拿魚腩以熟成10天大拖羅，以稻草燻製而成。

鮟鱇魚肝最中餅以傳統日式點心，配上時令肝醬，入口甘香。

酥皮焗抹茶雪糕 $120

每件餐具都大有來頭，包括日本著名陶瓷家作品、古代貴族藩主專用伊萬里鍋島燒、有田燒、波佐見燒及唐津燒等，日本酒杯、香檳杯都有多款，似藝術品咁精緻。

酒類亦都好多名貴選擇，六十款名牌清酒有十四代Black Label極上純米大吟釀、磯自慢35 Adagio極上純米大吟釀，香檳都有Dom Pérignon Andy Warhol Tribute Collection、Henri Giraud Argonne Ay Grand Cru Brut等限量版。

如此格局，價錢當然唔平。可以由午市著手，平均消費大約$300/位。不過偶爾豪一豪，試吓興別不同嘅日本菜都係唔錯嘅。

竹日本料理

地址：銅鑼灣恩平道28號利園二期地下G01號舖

文、相、片：Perrins