香港地食放題同磯燒海鮮嘅選擇都好多，但講到真任食海鮮就唔係度度有啦～銅鑼灣新開一間磯燒海鮮及串燒放題，所有海鮮同串燒都堅．任食，而且海鮮唔係得嗰一兩款可以Refill，足足七款都可以無限添加，最平$298就食到，好抵啊！
海鮮供應會跟據時令而有變化，每日供應指定七款，選擇包括鮑魚、海蝦、海蜆、海螺、元貝、貴妃蚌、蟶子皇、象拔蚌仔、馬刀貝及白鱔，每日採購，保證新鮮。
每枱都設有一個磯燒爐，客人可以體驗自己燒海鮮嘅滋味，款款都咁彈牙鮮甜。仲可以叫埋個卜卜蜆同辣酒煮螺放上爐滾一滾。
更多【新店直擊】： |
另外串燒都係無限任食，肉類、蔬菜、丸類等加埋都有四十幾款，全部即叫即燒，上枱嗰陣仲係熱辣辣㗎！
特別推薦燒韭菜、一口午餐肉、椒鹽燒賣及煙肉金菇卷，另外原條燒菠蘿都係必食之選，好Juicy！
講到放題，當然唔係淨係得咁多啦～餐廳仲有供應多款撈丁及小食，黃金鹹蛋黃撈丁味道香濃，鹹蛋黃同一丁麵好夾～
至於榴槤控一定要試埋呢個榴槤炸彈，入面除咗滿滿嘅榴槤蓉外，仲有拉絲芝士啊，好出色！
120分鐘任飲任食放題：
任食三款海鮮: (18:00前入座)$218 (18:00後入座)$238 (22:00後入座)$198
任食七款海鮮: (18:00前入座)$318 (18:00後入座)$338 (22:00後入座)$298
*星期五、六、日、公眾假期及其前夕每位另收$28附加費
地址: 銅鑼灣駱克道491-499號京都廣場9樓
文、相、片: Yanica