銅鑼灣地標之一Sogo嘅超級市場終於完成翻新！除咗有唔少第一次登陸香港嘅過江龍專櫃之外，其實仲有唔同美食可以留意，而且最近仲有台灣節，一站式可以買埋各款台灣美食！
 

健康低卡輕食　　Helfit Deli

本地健康生活品牌第一次開Deli Shop，賣點係有營養學家幫手設計Menu，例如三低醬龍蝦包顧名思義就喺近年大熱嘅龍蝦包上面加咗三低醬，而三低醬係特別調製，有效降低壞膽固醇、血壓同血糖。另外仲有各款果汁同果汁沖劑，最啱各位打工仔女。

地址：銅鑼灣崇光百貨地庫2樓B2-15B舖
 

法國皇室甜品　　Dalloyau

主打法式甜品，嚟緊5月1號仲會新出粉紅心形蛋糕。另外仲有啲新口味嘅曲奇都即將會推出，包括碧根果仁、香辣芝士同香草芝士，辣辣地鹹鹹地連男士都啱食。當然，經典嘅OPÉRA蛋糕同早前新出嘅干邑馬卡龍等等都有得食到啦。

地址：銅鑼灣崇光百貨地庫2樓B2-07F-G舖
 

即燒焦糖燉蛋　　Paul Lafayet

法國甜品品牌，唔少女孩子最愛嘅法式焦糖燉蛋Crème brûlée依然會繼續供應，睇住店員即場燒製焦糖脆面，記得要相機先食！另外Sogo店仲有獨家發售嘅抹茶脆餅Matcha Cremoso，其他蛋糕同馬卡龍供應。

地址：銅鑼灣崇光百貨地庫2樓B2-07D舖
 

東京人氣爆谷　　KuKuRuZa Popcorn

嚟自美國西雅圖，而係日本東京大受歡迎嘅KuKuRuZa Popcorn嚟到銅鑼灣開第二間專門店！同灣仔店一樣主打唔同口味嘅手製爆谷，包括人氣No.1嘅夏威夷海鹽焦糖口味，香港限定嘅薄荷可可，同酸酸甜甜帶少少芝士香味嘅酸奶洋蔥口味等約10款。

地址：銅鑼灣崇光百貨地庫2樓
 

台灣節限定年輪蛋糕　　iCookie

喺4月22號至5月10號呢段期間，嚟到超市仲有台灣節！當中最吸睛嘅就要數到呢個由台灣品牌首次喺香港推出嘅年輪蛋糕！由師傅手工一層一層疊上去嘅年輪蛋糕有趣致嘅不規則形狀，清甜薄脆糖皮入面係14層年輪蛋糕，而中間係忌廉芝士，夏天雪凍嚟食就最滋味。另外仲有朱古力味。

地址：銅鑼灣崇光百貨地庫2樓美食匯點
 

台灣手信專區 & 超市最新推介

超級市場裡面仲有台灣伴手禮專區，搜羅各式台灣美食，包括開飯仔係台灣手信巡禮都介紹過嘅老天祿鴨舌，同人氣黑橋牌肉乾、江記豬肉紙等等。

而超級市場亦有唔少日本美食，例如Kitty Fans務必留意嘅嘅山本海苔店Hello Kitty夾心海苔，同香滑濃郁嘅小林牧場乳酪等。鐘意日本清酒嘅話，仲有香港優先發售嘅三連星純米吟釀系列，同香港優先發售，日本暫時都未買到嘅花垣秘藏酒大吟釀！有心嚟掃貨嘅話，記得帶大啲嘅環保袋嚟啦。

文：Cathy
相：Kar、Cathy