近年香港多咗唔同風格嘅吐司店，呢間就主打越南法包同滑蛋吐司，材料豐富而且賣相吸引，立即成為打卡熱店。最近佢哋新出期間限定吐司，不定期更換口味，第一炮係唔少女孩子都好鍾意嘅法式焦糖燉蛋！
 

Try My Bread舊年11月開張，供應越南法包、滑蛋吐司、小食同特飲。唔少口味都係店主之前去唔同地方包括越南、韓國旅行而得到嘅靈感，籌備接近一年開店，食物同飲品都係即叫即製。
 

正宗越南法包（$44）

材料非常豐富！肝醬、扎肉、燻蹄、豬肉絲、蛋黃醬、鮮露等都係嚟自越南，麵包就喺香港一位越南師傅嘅出品，再加上本地新鮮蔬菜：芫荽、辣椒、青瓜、自家醃製酸菜。
 

法包會先焗過，食落唔會太硬太實，皮脆內韌。多款配料加起嚟口感同味道層次都好豐富，特別係胡椒香加上酸菜嘅酸味好醒神，而扎肉當中有豬耳，食落亦比一般嘅爽口。
 

（期間限定）法式焦糖燉蛋吐司（$40）

店主曾經做過甜品師傅，今年情人節出過自家製法式焦糖燉蛋，就試下將法式焦糖燉蛋加埋吐司！吐司先切十字焗香，扣上燉蛋，加埋砂糖用火槍燒成焦糖脆面，最後撒上糖粉點綴。

焦糖香脆味道苦甜，而燉蛋非常Creamy又帶蛋香，同外脆內軟嘅吐司好夾呀。
 

 

（右）脆炸軟殼蟹滑蛋吐司（$50）

熱賣吐司之一，厚身方包會用牛油煎香六面，然後加上沙律菜、滑蛋、原隻炸軟殼蟹同蛋黃醬。軟殼蟹係即炸，脆口之餘唔會太乾，仲保留蟹嘅鮮味。另一主角滑蛋亦的確係半熟滑溜，加埋沙律菜同蛋黃醬減低油膩感。
 

煙肉粒芝士醬脆脆薯格（$28）

小食同樣有心機，薯格即叫即炸，再加上煎香嘅煙肉粒、蛋黃醬同芝士醬，香脆惹味。
 

（左）木瓜牛奶沙冰（$32），（右）牛油果沙冰（$32）

木瓜牛奶沙冰以木瓜肉加牛奶為主，再加少少煉奶提味，味道微甜而且仲咬到少少果肉。牛油果沙冰用嘅係智利牛油果，特點係果肉比較綿滑，所以打成沙冰口感都相當滑身，味道天然。
 

Try My Bread
地址：長沙灣營盤街138A號地下

文：Cathy
相、片：Tom Li