天婦羅呢啲香口嘢，一向不乏捧場客，尤其啱啱新鮮炸起即食，嗰種暖笠笠又脆卜卜嘅口感實在令人難以抗拒。最近有間嚟自日本關西嘅天婦羅專門店首度登陸香港，喺沙田開業，更有多款坊間少見嘅天婦羅款式呢。

餐廳早喺2006年就喺日本兵庫縣開設首家店舖，分店遍佈日本全國，而家終於嚟到香港。食材同食譜主要都係源自日本本店。呢間舖最大嘅特色就係師傅們都好有心機創作天婦羅料理，以及採用自家特製炸漿。一般嘅天婦羅粉漿都係以麵粉同水作調和，但呢度嘅秘製漿粉，仲有加入如雞蛋等其他配料，令到炸完後，炸粉比平時食開嘅薄啲同脆啲。

師傅亦有透露，烹炸過程中最重要嘅一環，就係食材水份要適當咁印乾，上乾粉同埋粉漿嗰陣，一定要均勻。加上餐廳採用日本直送炸爐，令油溫迅速維持喺180度高溫，並以菜油烹炸，先至可以保持到天婦羅嘅味道同色澤。

餐廳設有吧枱，師傅沾粉同炸嘅過程都可以睇得一清二楚，你仲可以見到師傅好勤力咁成日都會隔走烹炸後遺留嘅炸粉。望住啲天婦羅新鮮炸出嚟，特別吸引。

全部天婦羅都係即叫即炸，款式選擇主要分有招牌之作、海鮮同蔬菜等。先介紹幾款較為特別，嚟到必試嘅天婦羅。紫蘇牛柳天婦羅，以紫蘇葉包住輕燒過嘅牛肉，外脆內軟之餘仲好肉汁，滲出紫蘇葉獨有嘅幽香，清新解膩。

日本雞蛋天婦羅算係比較少食到嘅一款，蛋黃濃香，汁底仲有啲甜甜地。一拮就流晒漿出嚟，會有少少嘥料，所以建議最好直接放入口，或者喺飯面上先拮開，等飯粒索滿蛋漿。

沖繩水雲醋物乃沖繩名物，中間空心，爽口微酸，炸成天婦羅後口感酥脆，仲有層滑捋捋嘅口感。

海鮮方面，大推一客原條明太子上嘅海苔明太子天婦羅，慷慨到不得了。海苔包住鮮橙色嘅明太子，先鹹後辣，就咁食係會重口咗少少，但佐酒或配飯都一流。

 虎蝦天婦羅

另外亦有多款蔬菜款式，好似北海道舞茸菇天婦羅同西蘭花苗天婦羅都值得一試，炸完之後食物嘅原味同口感依然清爽突出。

 甜品：番薯天婦羅配焙茶雪糕

新店開業優惠，凡惠顧堂食就可獲贈呢條cute版炸蝦天婦羅造型毛巾，數量有限，送完即止。

天ぷらまきの Tempura Makino
地址：沙田沙田正街18號新城市廣場一期1樓159號舖

文、相：Kar