身邊總有朋友好怕羊羶味，不過對於鍾意食羊嘅人嚟講，食羊就係要食嗰朕濃濃嘅羊羶味。呢排旺角有間食「羊」專門店好有話題性，事關有好多稀奇嘅羊部位都食到！開飯仔都親身試食咗其中一個古怪部位添！究竟味道係點呢？

望下張餐牌先！除咗羊肉、羊腸、羊肚、羊肝、羊腰、羊腳呢啲常見部位，仲有其他聽到都驚一驚嘅部位，好似羊腦、羊胎盤、羊眼、羊鞭、羊睪丸等，你又夠唔夠膽挑戰下呢？

首先試食最簡單嘅羊肉粉！落單時，店員會先問你要唔要辣，要辣嘅話，廚房就會預先加入辣椒油。唔夠嘅話，仲可以用枱上嘅配料自行加料。

有（左起）鹽、花椒、辣椒乾、生抽、醋，以及原粒蒜頭添，好多選擇。

羊肉粉好簡單，配料一眼睇晒：粉、羊肉及芹菜芫茜。分量都唔細，女生食一碗都應該好足夠。

湯底用羊骨及其他配料熬咗10幾個鐘頭，依然好清，而且呷一口就知道湯底無落味精、雞粉。起初以為無乜羶味，但越食得多，口腔入面啲羶味越嚟越勁添！

米粉粗身兼滑溜，咬落去幾彈牙，有少少似烏冬！另有麵條選擇，質地好似擔擔麵。至於羊肉都幾入味，而且唔會好肥膩，但可惜略嫌過薄，食落不太有肉感。

店員教路，最佳食法就係加入辣椒乾及生抽食，味道更突出。

一碟羊雜可試勻羊肝、羊肚及羊腸3個部位，羊肝好「粉」，羊肚爽口，羊腸軟腍，基本上同食牛肝牛肚牛腸無乜分別，只係多一陣羶味，尤其是羊腸。不過全部切到size細細，感覺似前菜多啲！

終極挑戰──羊鞭！

其實羊鞭個名聽落好恐怖，食落似乎係另一回事。羊鞭會以湯水奉上，個湯底基本上同羊肉粉湯底係一樣嘅，不過喺羊鞭湯會再額外加入花椒、胡椒，一飲就感覺到唇上有股酥麻嘅刺激感，但並非辛辣嘅辣勁，正！至於味道，口感好似牛筋咁軟腍，好有「骨膠原」嘅感覺，而且羊羶味比起羊肉、羊膠濃郁得多，嗜羊狂迷應該要試下！

大大塊木造嘅價目板，好有氣勢。

雖然小店係巷仔舖，但經過嘅路人都不禁注目一番：亮麗嘅木系裝潢、落地大玻璃、小橋流水嘅壁畫、偽磚牆嘅出菜位、木造屏風等，好有中式風格。而且，仲有少量立食座位添！

貴州遵義黔營羊肉粉
地址：旺角通菜街86號利群大廈地下E號舖

文：Joy