無論係想短時間醫肚，定係坐定定喺餐館想試小食，包點都係一個唔錯嘅選擇。唔好以為得西式包或者榴槤包先會推陳出新，其實近年中式包都有唔少兼顧Gimmick同味道，下面六款特色中式包你試過哂未？
尚香 蟹黃湯包
近日喺Instagram同Facebook瘋狂洗版嘅「神奇的包子」，其實就係旺角呢間新店嘅出品。品牌嚟自江蘇，最架勢嘅地方係《舌尖上的中國》都介紹過。喺節目中考起唔少外國人嘅呢個蟹黃湯包到底要點食？答案就係先咬開一個細窿，小心將吸管插入去，啜啖鮮甜蟹湯先，飲到差唔多再食埋個皮同裡面嘅蟹黃同蟹肉。因為要包住湯汁所以層皮唔算太薄，勝在蟹黃鮮甜又有新鮮感。
金頤小館 下海小籠包
彩色嘅小籠包唔係咩新鮮嘢，不過層皮同餡料全部都係唔同食材配搭就非常少見！北角呢間上海菜館最近就推出呢籠「下海小籠包」，一籠六件分別係白色嘅原味X鮮肉，紅色嘅紅菜頭X胡椒蟹、黑色嘅墨魚汁X燒汁鰻魚、橙色嘅甘筍X冬陰公大蝦、黃色嘅日式咖哩X咖哩墨魚，同最後綠色嘅班蘭葉X蒜蓉瀨尿蝦，全部都係食材自然顏色無加人造色素，暫定供應到12月2號咋！
米路18 梅菜扣肉包
各位平時鐘意相機食先嘅Foodie留意！尖沙咀呢間外賣店除咗有唔同便當同三文治供應之外，仲有呢個賣相Cute到一個點嘅梅菜扣肉包！唔單止有可愛熊仔肉掌印，個包本身都係熊掌形嚟。而且個餡亦相當出色，分量多到幾乎爆餡之外，梅菜扣肉食到啖啖豬肉又唔會太肥膩，醬汁亦夠惹味。不過小店逢星期日休息，星期一至五要等到下晝兩點後先有梅菜扣肉包供應，小心唔好摸門釘唷。
程班長台灣美食 刈包
呢種用包夾住肉餡嘅包，有無令你諗起台灣夜市裡面嘅刈包？其實喺香港一樣食到呢款台灣地道小食！例如喺荔枝角嘅呢間台灣菜館，佢地嘅刈包又名虎咬豬，用饅頭夾住大大塊五花肉、花生碎、酸菜同芫茜，五花肉滷得夠入味又軟腍，同酸菜等配搭一嚟增加味道層次，同時亦減低五花肉嘅肥膩感，令人瞬間遺忘任何減肥大計一啖接一啖係咁食。
唐宮小聚 松露香菇 & 玫瑰饅頭
去茶樓飲茶唔單止得叉燒包菜肉包嘅，畀多少少心機，中式蒸包仲有好多種可能。例如中環呢間摩登點心中菜館就有兩款拿手包點，松露香菇蒸出嚟十足一個個冬菇咁，唔單止顏色似連紋理都做埋，咬開裡面係真·冬菇同松露，濃香滋味。另外玫瑰饅頭就以粉嫩玫瑰造型出場，灑上真·玫瑰花瓣，一上枱就聞到淡淡花香，應該可以俘虜八至八十歲嘅女士們。
飲茶 睇住流奶 & 吉川奶子
講到茶樓新派包點，最後當然要提埋流沙包啦。能夠平衡得意賣相同味道嘅，就有呢間尖沙咀同中環都有分店嘅新派點心茶樓。橙色嘅睇住流奶其實係流心奶皇包，奶皇餡鹹甜有致；綠色嘅吉川奶子就係流心綠茶包，綠茶醬有淡淡茶香同奶香。最重要嘅係兩款流心包上面都有對眼，唔少人都鐘意喺對眼下面篤個窿再擠少少流心餡出嚟，拍短片放上Instagram呃Like話咁易啦。
開飯編輯推介：
2. 10月份好評餐廳十強
熱門文章推介：
1. 一齊滾起佢！季選任食火鍋
3. 油麻地特色美食地圖
隨時接收最新資訊
讚好OpenRice專頁！