每次去日本其中一樣必吃嘅食物，一定有鰻魚飯份！香港而家都有鰻魚飯專門店，可以一解思「香」之苦喇！鰻堂雖然唔係日本過江龍，位於food court入面，不過由有20年經驗嘅日籍鰻魚批發商創辦，鰻魚飯絕對拍得住日本！

全店有4款唔同份量同製法嘅鰻魚飯，鰻魚係大陸養殖嘅日本種鰻魚，每條約500克算係大size，選用中間最肥美嫩滑部位，以日本傳統五重燒方法炮製。先於工場切開去骨，白燒再蒸，重覆以炭火烤足4次，期間塗上日本空運到港，以鰻魚骨及醬油製成鰻魚汁，最後上枱前再用火槍炙燒。鰻魚脂肪平均，而且燒至外層微脆，厚肉香滑。米就選用青森縣出產秋田小町米，飯粒飽滿又索汁。

鰻重定食 $68

超鰻重定食 $128

一般日本連鎖店只有大約70克鰻魚，而鰻堂就有100克，份量十足。食到唔停得口，可以揀有多一倍鰻魚嘅超鰻重定食。如果多人分，不如索性柯打鰻登富士山定食，足足有4條鰻魚成400克，有900克堆到成座山嘅白飯，加埋「山頂」隻溫泉蛋，真係4個人都未必食得晒！

鰻登富士山定食 $278

另外仲有香甜鰻魚蛋定食，鰻魚再加滑蛋同溫泉蛋，更加滑溜。牛魔王可以試產黑毛安格斯定食，用美國黑毛安格斯牛肉，加埋意大利水牛芝士，熱辣辣有拉絲效果！

鰻魚蛋定食 $88

水牛芝士黑毛安格斯牛定食 $68

地址：觀塘觀塘道418號創紀之城五期apm 2樓Cooked Deli by city'super

文、相、片：Perrins