香港早晨！5個港島人空肚食早餐之地

早晨呀喂，朝朝趕頭趕命咁返工、返學，個早餐一係唔食，一係頹食，咁點得㗎？先唔計話食早餐會健康啲呀醒神啲呀聰明啲呀咁樣，一朝早食返個豐豐富富嘅早餐，飽晒先開工先係Good morning㗎嘛。嗱，邊樹有早餐食都幫你搵埋喇，早少少起身啦聽日，記住，食早餐，呀，講漏咗，記住空肚食早餐呀！

中環邪惡雙拼三文治 裕興咖啡

Photos by foodhistories & MK_sweet
大排檔喺香港買少見少，搵個朝早早啲起身嚟食下香港嘅獨有情懷啦。係呀，要朝早，你晏晝嚟佢已經閂咗門㗎喇，仲要係星期一至五嘅朝早喎，假期唔開㗎。

炒蛋雙拼三文治係呢度嘅招牌菜，食得辣嘅不妨揀五香肉丁炒蛋三文治。記得，記得，記得叫烘底加芝士！大大份，料多多，五香肉丁碎上混埋喺啲蛋漿裡面，再加埋花生醬、椰菜，同埋熱辣辣流出嚟嘅芝士，塊多士又薄又脆，一啖食落口真係冇得頂，儀態都唔顧得咁多的了，配埋杯熱奶茶絕對係完美嘅早晨。不過想食就記得要早啲起身去食喇，講到明得一個人製作，落完單閒閒地最少都要等返四、五個字，唔係等陣食唔切又遲到就唔關我事喇。

上環滿足熱粥 生記粥品專家

Photos by MR小a & crystyp
一朝早如果想食清清地嘅，可以諗下呢間粥舖喎，不過同一條街有幾間生記，想食粥嘅就唔好入錯喇。

餐牌上粥款好多，有單拼雙拼三拼，其中最出名嘅係鯇魚腩粥，大大嚿魚腩，大過隻匙羹添呀，未食落口都已經好興奮，感覺足料先嘛。再食一啖，啲魚腩生熟度啱啱好夠晒滑，仲好有鮮味，一啲都唔腥。識食嘅，一定係點埋隨粥附送嘅薑蔥醬油。唔一定要辟腥先點豉油嘅，令本身嘅鮮味再突出啲都點得，怕骨嘅不妨改點鯪魚球。另外如果鍾意食內臟嘅朋友可以試下豬潤，肥厚得嚟又好爽口。不過提一提返啲度嘅粥相對嚟講，可能稀咗少少，不過啲米煲到開花咁幾好食！

大坑香滑車仔腸粉 順興茶檔

Photos by 蒙奇奇 & 搵食能手
早起的鳥兒有早餐吃，係因為有人比鳥兒更早起去預備早餐呀！呢間大排檔每朝6點就開舖㗎喇，淨係做早巿同午巿。

最多人都係慕車仔腸粉嘅名而去嘅，呢度嘅車仔腸粉的確有佢嘅獨特性，滑就不在話下啦，熱辣辣食落有淡淡嘅米香，自選配料就都係一般車仔麵嘅選擇，魚蛋牛腩豬皮嗰啲，都幾多款，值得一提嘅係魚蛋夠晒彈牙，蘿蔔亦都非常清甜。除咗車仔腸粉，另外都有普通通粉麵食類嘅早餐，配返份炒蛋同牛油多士烘底都一樣得。話呢度嘅炒蛋出色，一啲都唔誇張，色澤鮮黃，滑捋捋又有蛋香！而多士唔要牛油嘅都可以揀奶油、果jam或者花生醬粒。

灣仔明星炒蛋多士 華星冰室

Photos by gilda & foodie jo
一入到去，成間舖都貼滿晒明星相，話唔定有朝畀你一個唔覺意，野生捕獲咗某個明星。哈哈，不過都係諗下好喇，睇返有咩食實際啲。

叫得冰室，食物種類就預咗唔多㗎喇，呢度最好食一定係多士，我話嘅。塊多士好厚㗎，係名副其實嘅厚多士呀！塊包會幫你切埋邊先烘，烘嘅時間又校得剛剛好，脆卜卜有色水但又唔會燶，熱熔咗嘅牛油就滲晒入塊包度，好香！另外，係得呢度先有得食嘅校長多士都係另一推介，未食過嘅話聽個名都唔知即係咩多，嗱，其實係黑松露加芝士呀！佢哋首先喺塊厚多士度搽上黑松露醬，然後再舖層芝士就拎去焗，最後一開四咁一碟上，好香好香！食完多士再飲返杯熱飲先至返工，醒晒！呢度唔淨止得咖啡奶茶，仲有熱嘅3.6牛奶呀！

同埋呢，早餐供應時間係去到12點㗎，爛瞓嘅豬仔都應該有機會可以一試嘅。

銅鑼灣悠閒Brunch Brunch Club Supper

Photos by kamikoliu & Mocha Mocha
講咗幾間港式早餐，就介紹返一間提供英式早餐嘅餐廳啦。而且我仲知道你哋一放假就瞓到好晏，起身都過晒餐廳嘅早餐時間，嗱，呢間呢，全日都有得食All Day breakfast㗎，你當食早餐又好brunch又好啦。

最豐富嗰款係Mixed Grill with Croissant，牛角包呀、炒蛋呀、豬肉腸呀、雞肉呀、薯餅呀、茄汁豆呀等等咩都有得食，不過跟餐嘅係muffin，牛角包要加少少錢留意返。但面層酥皮好鬆脆，內裡嘅麵包又好軟熟，牛油味又香喎，抵加嘅。

意大利奄列都好特別，呢隻奄列淨係用蛋白整㗎咋，所以好幼滑，而個餡就係芝士、蘑菇同洋蔥，跟蛋配嘅係充滿麥味嘅麥包，成個餐嘅感覺都好健康。另一款蛋系製品Benedict亦好吸引，望住個半生熟，淋上鮮黃蛋黃汁嘅水波蛋，係吸引嘅，仲可以自選配料，鍾意parma ham又得，煙三文魚又得，一切，啲蛋漿再流入埋下面個鬆餅度，噢，不要再說了.jpg！

文：Kar

隨時接收最新資訊
讚好OpenRice專頁！