喺香港飲茶選擇有好多，近年亦有唔少新式茶樓或點心店冒起。但有時都不免會懷念舊時同家人去茶樓，衝出去點心車揀點心，食傳統點心嘅感覺。今期介紹香港剩餘唔多嘅舊式茶樓畀大家，好多都仲供應懷舊糯米包、豬膶燒賣、釀魚肚同上湯煎果等點心，家陣真係唔係周圍食到，新一代都未必識㗎喇！

自助式山區茶樓 端記茶樓

呢間位於大帽山山腰嘅茶樓係唔少行山人士飲早茶好地方～而且真係好有風味，二樓設有露天茶座，可以邊食點心邊睇風景。而且呢度嘅點心係自助形式，可以出去自己揀自己鍾意嘅種類，見到啱就拎，鹹甜交錯咁食，好有舊時點心推車嘅感覺。蝦餃燒賣正常發揮，反而臘腸卷、雞球大包、芋角、炒銀針粉而家坊間就真係好少見喇。西洋菜都係餐廳特產，採用產自茶樓下面川龍村嘅菜田！食落好嫩且鮮甜，唔可以錯過！

圖: DollyLing

招牌流沙包 新興食家

西環人飲夜茶好去處，一樣保留咗自己拎點心嘅傳統，會有員工大叫「新鮮出爐呀～」，本土味濃厚，款款都係即製即蒸㗎。最受歡迎嘅點心包括招牌流沙包、炸鮮奶同蝦餃，流沙包外層好鬆軟，內餡一撕開就流心，蛋黃味香濃又唔會太甜；另外炸鮮奶新鮮熱辣辣，外脆內軟又香又滑！蝦餃係可以親眼見到師傅每一粒鮮製，漲卜卜好彈牙。仲有好多而家好少有嘅點心，如懷舊糯米包，皮薄糯米好香，連香芋鴨腳紮、豬膶燒賣都有得食～

圖: eatgoodwestfoodie

傳統而有特色 勝興茶室

香港少數仍使用傳統點心車嘅懷舊茶室，真係童年回憶呀，而家用都用機械人送餐車lu。假日想搵個地方玩可以去坪洲試下。雖然係傳統飲茶，但佢哋啲點心都好有特色，如五香荔芋燒腩卷，事先將芋頭及腩肉炆煮，芋頭軟糯，腩肉都好入味，一層芋頭一層腩肉，好出色！另一招牌桂花卷係冇桂花嘅，而係煎魚肉腐皮捲，外層香脆魚肉彈牙，點埋泰式辣醬食好惹味。另外仲有鵪鶉蛋燒賣同酥皮蓮蓉奶黃包都值得一試呀。

圖: nrc

古色古香 陸羽茶室

1933年已經開業，裝修典雅有氣派，仍舊保留古色古香風格。釀豬潤燒賣厚度十足，口感爽脆粉嫩，味道甘香，薑汁中和微微內臟腥，底層嘅豬肉球爽滑鮮嫩，肉香好濃。蛋黃麻蓉包都係其中一款懷舊點心，包身軟糯輕盈，麻蓉餡有豐富嘅白芝麻同花生香，食落綿密香甜。煎粉果連湯外皮香脆煙韌，餡料主要有蝦肉、韮黃等，點埋湯食軟中帶脆。

圖: FeivouriteFood

文: Yanica