燒味總係畀人一種麻甩嘅感覺，但同時亦係港人最熟悉嘅Comfort food，有時自己一個唔知食咩好，整返碗燒味飯就最啱啦。叉燒亦係燒味嘅靈魂之一，微微燶邊加埋豬油香，配埋香甜嘅蜜汁，真係令人流晒口水。今期介紹8大人氣叉燒店畀大家，睇下有冇邊間係你食開！
本地蜂蜜叉燒 人人和平小飯店
半肥瘦厚度適中，肉質鬆化，豬肉嘅油香都好突出，而且叉燒都有燶邊呀。呢間嘅叉燒係用蜂蜜製成而唔係麥芽糖，甜味更自然，唔會死甜，鹹甜比例亦啱啱好～
圖: 古法炭火烤製 新桂香燒臘
柴灣人氣燒味店，成日都大排長龍！採用古法炭火烤製，所以叉燒會帶有炭香，好出色。選用五豐新鮮豬肉，唔會有雪味，肉質彈牙軟腍，就算叫瘦叉都好腍身，啱晒怕肥嘅朋友。不過最正梗係叫個燶邊半肥瘦啦，帶有油脂香真係好正。
圖: chillfoogle
第一勾魂叉燒 大圍小館
以抵食又有特色而聞名、古色古香嘅中菜館，2022年仲獲得米芝蓮推介添。叉燒佢哋有兩款，就係午市先有嘅第一叉同晚市先供應嘅勾魂叉。選用梅頭肉，勾魂叉會於上菜時塗上15年嘅陳皮醬，跟住會用火槍將叉燒外皮燒至燶邊，配埋旁邊金鳳脆米一齊食，食落卜卜脆！味道方面除咗蜜汁香氣仲有陣陣陳皮香～
圖: cakelicious
超厚切叉燒 西苑酒家
都係出名食叉燒嘅粵菜，最招牌大哥叉燒，超厚切食落啖啖肉好正，叉燒半肥瘦肉質都好軟嫩，鹹甜適中，因為太受歡迎，好快賣晒，想食嘅話可以打去問下仲有冇先。
圖: edisonw7474
蜜汁黑豚肉叉燒 舍 
鍾意食熱辣辣嘅叉燒呢間就啱晒喇。叉燒以火㷫住上碟，咁樣熱住上醬汁質地就唔會變，可以食返醬汁最清甜嘅味道。肉質有咬口而且爽脆，油脂分佈均勻。
圖: Monkey Hin
明爐烤蜜汁叉燒 沙田18 
咁多間都叫蜜汁叉燒咁呢間又有咩特別呢～以蜂蜜、玫瑰露酒、豉油等醃製，更用上本地永利威玫瑰露炮製，肉質軟腍帶玫瑰露香氣，為叉燒增添獨特味道。
圖: BananaYEAH
油香四溢蜜汁叉燒 逸東軒
叉燒以半肥瘦肉製作，用自家秘製醃料醃製，帶輕輕嘅蜂蜜甜香。叉燒即叫即燒，鬆化可口，肥瘦適中帶點焦香，就算放耐咗肉質都唔會變硬呀。
圖: 即燒伊比利亞叉燒皇 神燈海鮮酒家
上枱時叉燒充滿光澤，選用伊比利亞黑毛豬，層次分明，口感超柔軟，肉汁豐富亦帶點甘香。另外仲有用牛製成嘅牛魔皇叉燒，將牛肉以傳統叉燒方法製成，外皮焦香好惹味。
圖: 文: Yanica
