香港有唔少夜鬼，都有個共通嘅問題，就係：為何深宵總是餓？然後就引申另一個問題，夜麻麻去邊度搵食？唔通次次都淥個杯麵咩？唔使煩，各區都有唔少深夜食堂，開飯仔同你哋逐區去食宵！今次先去旺中帶靜嘅佐敦啦～
選擇多多邊爐 打邊爐 
一大班夜鬼聚頭，最好就梗係打邊爐啦，慢慢滾下滾下，吹水吹到２點都得，唔使趕頭趕命淥！呢間火鍋店嘅湯底好足料，有養生花膠翅裙冬瓜燉雞鍋、椰子沙白蜆水蟹鍋等，仲有雞煲添~另外有唔同產地嘅牛肉、海鮮選擇，仲有自家製手打丸，當中以自家手釀流心墨魚丸最受歡迎啦！咬落彈牙，中間釀咗奶黃餡添~
收舖時間：02:00
地道大排檔 新肥泉海鮮大排檔
講到宵夜，又點可以唔提大排檔呢？呢間大排檔一點先閂，開喺熟食中心，一大棚人嚟食都冇問題！你噏得出嘅港式小炒，佢哋都有！而且相當有鑊氣。特別推介佢哋嘅豉椒炒大蜆同椒鹽賴尿蝦，又新鮮又大隻！
收舖時間：01:00
創新四川串燒 川燒
宵夜就一定唔少得串燒啦！呢間串燒店老闆認真有心機啦，親自去四川搵香料、菜式，單係佢隻辣醬就已經用足10幾種香料製成。串燒款式超過100款，有燒鮮白鱔、肉碎燒茄子、燒芝麻湯圓、川燒薄餅等，款式夠創新，喺第二間舖都未必搵得返啊。
收舖時間：02:30
炭燒味十足 燒串煲
深夜食返兩串串燒，飲下啤酒咁先至有feel。呢度嘅串燒即叫即燒，食落好有炭燒香。款式多到眼花瞭亂，包括燒五花腩、烤羊架、燒雞腎串、燒紫薯等。鍾意食魚嘅朋友，不妨試下佢哋嘅燒魚鮫，魚皮燒到卜卜脆，咬落去成口骨膠原！
收舖時間：02:00
超豐富法包 添記法式三文治
餓餓地但又唔想搞得太夜，至在填飽個肚嘅話，咁不如買個法包邊行邊食啦！呢間小店提供法包同蒜蓉包，法包有分大、小兩款揀，但入面嘅餡都一樣咁足料，有扎肉、腩肉、嚼肉（雞潤加豬肉碎）同鹹豬手肉，再夾埋醃蘿蔔絲、青瓜、蕃茄。
收舖時間：24:00
養生中式糖水 大街小館
圖﹕一日最尾嗰餐，以甜品糖水作結，會令人好滿足。呢間糖水舖有中式、西式，連綿綿冰都有，甜品控啱晒！較受歡迎嘅有椰汁雪耳桃膠燉木瓜，同埋椰皇蛋白燉桃膠，大大碗之餘，食落仲好香甜，咁夜都未瞓係要食返多少少養生嘢嘅(誤)。
收舖時間：01:00（星期日至四）、02:00（星期五至六）
文：Kiko
編：Kar
