近年愈嚟愈多人鍾意去東南亞旅行，好似泰國呀越南呀咁，呢啲地方嘅菜式都有啲共通之處，就係好FRESH好清新，酸酸地又辣辣地咁，係幾開胃嘅。鍾意食嘅朋友留意喇，喺中環有間新開咗三個月嘅東南亞菜餐廳，望住維港海景，集泰國、越南、新加坡、馬來西亞等國嘅風味於一身，同時又為食材加咗些少變奏。

去過越南嘅實知道，當地好出名青芒果沙律，呢道菜就係咁演變出嚟。個名叫「芒果芒果魷魚沙律」，笨唔係開飯仔打多咗次，而係餐廳用咗兩種芒果去製作呀。分別係酸酸爽爽嘅泰國青芒果同鮮甜多汁嘅呂宋芒，夾埋燒過嘅魷魚、用魚露調配嘅沙律汁同炸脆藜麥，作為前菜，清新稱職。

講到東南亞菜，喇沙梗唔少得。有手撕雞喇沙同龍蝦喇沙揀。個喇沙湯底係自家製㗎，爆香咗個蝦頭用嚟熬湯，再加成23種食材入去，酸辣鮮甜味都幾balance。一夾，係油麵同粉絲嘅組合，兩樣嘢都索湯，啖啖香濃。

另外要介紹兩款限量菜式，早去先有得食！鹽焗原條筍殼魚每日限量供應8條，棕櫚糖脆燒雞每日亦都係得廿份。前者喺魚嘅口、肚度放入紅乾蔥、香茅、金不換等多種香草去腥同提取鮮味，再用蛋白同海鹽蓋住焗25分鐘（即叫即焗㗎），魚肉新鮮，建議連埋自家調配嘅酸辣魚露醬汁一齊食，會開心啲。

幾飽都好，甜品係第二個胃嚟嘛。木瓜 . 士多啤梨 . 西瓜冧酒冰沙 呢件事好夏天，西瓜加冧酒整成嘅沙冰涼浸浸，甜中帶醇，木瓜爽實之中，除咗有本身嘅果甜，仲有另一陣甜味，係浸過雲呢嗱糖水嘅味道。

至於特飲方面，呢度有唔同嘅cocktail同mocktail供應，最特別嘅一款可能係TOMYUMTINI。聽個名就知，有冬蔭味！用vodka加liqueur、蘋果汁、檸檬草、青檸、薑等材料調配，未飲就率先聞到陣冬蔭公味，幾刺激，仲愈飲愈辣。

Market S.E.A
地址：中環港景街1號國際金融中心3樓3075號舖

文、相：Kar